|
|
Бүген кемнәр туган
|
|
Архив
|
03.08.2010 Җәмгыять
ЭССЕ КИТӘР, ГАДӘТ КИТМИАракы эчмәскә, тәмәке тартмаска, ит ашамаска, ә аның урынына яшелчә һәм җиләк-җимешләргә өстенлек бирергә, кайнар яшел чәй эчәргә һәм салкын душта коенырга. Эсседән саклану өчен табиблар әнә шулай эшләргә куша. Ләкин халыкны белгечләрнең киңәшен тотып сәламәт яшәү рәвеше алып барырга урамдагы кызулык та мәҗбүр итә алмый икән. Ә сезгә быел күптәнге гадәтләрегезне үзгәртергә туры килмәдеме? Фарис ГАЛЛӘМОВ, табиб-психотерапевт:
– Әзрәк ашый башладым. Аның каравы, суны күбрәк эчәм. Көн артык кыздырса, мунчага кереп китәм. Андагы эсседә утырып чыккач, урамдагы һава салкын булып тоела башлый. Эш урынымда кондиционер бар, шуңа күрә авырлык тоймыйм. Киресенчә, мондый һава торышы ошый да әле миңа. Кызынырга җылы якка барасы юк, иртән ничек киеним икән, дип аптырамыйсың. Чүлдә гарәпләр төнлә эшли бит. Озакламый безгә дә шулай яши башларга туры килмәгәе. Берничә дистә елдан бездәге иң салкын температура нуль градус була, диләр.
Гөлчәчәк НӘҖИПОВА, Татарстан Милли музее генераль директоры:
– Җиңелрәк ризык ашарга тырышам. Кич белән бөтенләй ашыйсы килми. Су белән сөтле чәй генә эчеп торам. Табиблар яшел чәй эчәргә киңәш итсәләр дә, миңа ул ошамый. Авыл баласы булгангамы, сөтле кара чәй кирәк. Эштә шактый авыр. Кондиционерлар җитми. Алар күргәзмә залларында гына бар. Без дә күбрәк шунда булырга тырышабыз.
Нәфис ГАЛЛӘМОВ, Левченко бистәсендәге махсус мәктәп директоры:
– Сигез ел элек йөрәккә бик катлаулы операция ясаткан идем. Шуңа да эсселекнең халыкка никадәр авырлык китерүен бик яхшы аңлыйм. Ләкин шунысы да бар: үз-үзеңне дөрес тотсаң, ул кыенлыкны җиңәргә мөмкин. Миңа чишмә суы җиңеллек бирә. Көнгә 2-3 литр су эчеп бетерәм, кыяр-помидор ашарга тырышам. Аларның да тозлысына өстенлек бирәм. Иртәнге ботканы элек тә ашый идем, хәзер дә калдырмыйм. Эштә бик эссе. Бүлмәләр кондиционерсыз. Ләкин өйгә иртәрәк кайту турында уйлап та караган юк. Балалар белән эшләгәнлектән, аларны калдырып китеп булмый.
Алмаз хәзрәт МӨХЛИСОВ, “Казан нуры” мәчете имам-хатыйбы:
– Яшел чәйгә күчтем. Моңа кадәр кара чәй эчә идем. Аракы, тәмәкене, Аллага шөкер, элек тә кулланганым булмады, хәзер дә алардан ерак йөрим. Эссе дип ашауны киметмәдем кебек. Бары тик суны гына күбрәк эчә башладым. Ышыграк урыннарда булырга тырышам.
Илназ САФИУЛЛИН, җырчы:
– Кояш иртәдән үк минем тәрәзәгә карап кыздыра башлый. Шуңа да гадәттәгедән иртәрәк торам. Эссе булгач, эшләргә дә, уйларга да авыррак. Бөтен баш мие кыза. Төш вакытында бигрәк тә кыен. Ләкин барыбер эш буенча йөрергә, чабарга туры килә. Салкын су эчеп, булдыра алганча ышыграк урында йөрергә тырышам.
|
Иң күп укылган
|