“Мәчет төзелешенә каршы булганнарга да азык-төлек наборлары өләштек” (ФОТО)

Казанның Авиатөзелеш районында төзелүче “Рәхмәтулла” мәчетенең бинасы әле сафка басмаса да, мәхәллә эше гөрли дияргә була. Рамазан ае дәвамында мохтаҗларга ризык өләшенде. Изге айның соңгы көнендә егетләр, хатын-кызлар, хәтта балалар да мәчет территориясендә чисталык өмәсе – “субботник” үткәрделәр. Ә бүген Ураза гаетендә мохтаҗларга 140 пакет азык тараттылар.

Хәтерләсәгез, бер ел элек Казанның Симонов урамында мәчет төзеләчәк дигән сүз таралгач, күпләр бу башлангычка каршы чыкты. Якын-тирәдә яшәүче кайбер кешеләр кемдер азан яңгыраудан курыкты, кемдер парковка машина белән тулыр дип борчылды. Бүген исә, азык-төлек наборлары шул исәптән әлеге йортларда яшәүче кешеләргә дә өләшенгән.  

- Күп кешеләр мәчет төзелешенә каршы булган иде. Бүген шул йортлардан шактый кеше килеп азык-төлек наборлары алды. Мөселман булган кешеләр генә түгел, башка диндәге кешеләр дә. Бу эшне без район хакимияте белән берлектә башкардык, иң элек социаль яклау бүлегеннән мохтаҗлар исемлеген алдык. 140 пакет өләштек. Килеп тә алдылар, килә алмаучыларга илтеп тә бирдек. Балалар татлы бүләкләргә шатланды.