18.05.2020 Җәмгыять

Казанда платога ягъни эпидемиянең күтәрелештәге тигезлек яссылыгына җиттек

Коронавирус сәбәпле кертелгән үзбикләнү режимы 12 майдан бераз йомшартылды. Ләкин, башкала мэры Илсур Метшин шәһәр штабы утырышында режимның бетерлмәгәнлеген искәртте.

- Үзбикләнү режимын йомшартуны кайберәүләр эшчәнлеккә рөхсәт дип кабул итте. Махсус күрсәтмәсез эшчәнлек башларга ярамый. Барысы да катгый контрольдә тотылсын, битлектән һәм перчаткадан йөрү зарур, - дип кисәтте мэр Илсур Метшин. - Шушы авыр вазгыятьтә санитар таләпләрне катгый үтәп эшчәнлек алып барган, коллективларда эш урыннарын саклап торган предприятиеләргә һәм эшкуарларга рәхмәт!

“Плато” була гына күрсен

Татарстанның сәламәтлек саклау министры урынбасары-Казан шәһәре буенча сәламәтлек саклау идарәсе җитәкчесе Владимир Жаворонков сөйләгәннәргә караганда, Россиядә һәм Татарстанда коронавирус йоктыручыларның кискен артуы теркәлми. “Билгеле бер күләмдәге кешеләр авыруы теркәлә, кискен сикереш юк. Без Казанда платога ягъни эпидемиянең күтәрелештәге тигезлек яссылыгына җиттек, якын арада авыруны киметә башлауга ирешербез дип өметләнәбез”,-диде Владимир Жаворонков.

Соңгы көннәрдә республикада коронавирус йоктыруның 80 яңа очрагы ачыкланган, шуның 61е-Казанда.

Мунча штрафы

Казан шәһәре буенча эчке эшләр идарәсе җитәкчесе урынбасары Валерий Саматошенков таныштырганча, 12 майдан соң да санитар таләпләрне үтәмәүче 2 меңнән артык кешегә административ беркетмә тутырылган. Мәсәлән, 420 кибетчегә һәм сатып алучыга, 240 җәмәгать транспорты шоверына һәм пассажирга штраф язылган, 45 җитәкчегә һәм юридик затка да штраф чәпегәннәр. Инде бер мәртәбә штраф түләгәннән соң да акылга утырмаучылар бар икән. Үзбикләнү режимы таләпләрен бозган өчен бер җәмәгать туклануы предприятиесенә-500 мең сум, ә сауна хуҗасына 250 мең сум штрафны кабатлап чәпегәннәр.

Утырма яннарыма!

Казан шәһәренең парклар һәм скверлар дирекциясе директоры Марат Закиров штаб утырышында хәбәр иткәнчә, 12 майдан Казан паркларында һәм скверларында йөрергә рөхсәт. Гадәттә, паркларда култыклашкан өлкәннәргә, җитәкләшкән гаиләләргә һәм качып кына үбешкән яшьләргә юлыгыр идең. Тик, коронавирус яшәешебезне үзгәртте: кешеләр әлегә паркларда бер-берсе белән 1,5-2 метр ара сакларга тиеш. Балалар уен мәйданчыкларына әлегә дәррәү тупланырга ярамый. Паркларда 16 сәүдә ноктасы эшли, әмма алар ризыкларны чыгарып кына бирә. Горки-Әмәт урман паркында фонтан инде эшләтеп җибәрелгән, май ахырына парклардагы барлык фантаннар да җанланачак.

Коену сезоны

Коронавирус шаукымында ямьле яз да узып бара. Казанда 1 июньнән җәйге коену сезоны башлана. Рәсми рәвештә 1 июньнән әлегә “Комсомольское” һәм Аккош күле комлыклары гына ачыла.

Эшкуарларга ярдәм

Казанда 80 меңнән артык кече һәм урта предприятие эшчәнлек алып бара. Шәһәр Башкарма комитеты җитәкчесе урынбасары Илдар Шакиров сөйләгәнчә, эшкарларга федераль һәм республика бюджетларыннан финанс ярдәме күрсәтелә. Ташламалы кредитлар бирелә, декларация тапшыру 3 айга кичектерелгән. Муниципаль биналарны һәм корылмаларны арендалаган эшкуарлар апрель һәм май айлары өчен аренда түләвеннән азат ителгән.

Үзмәшгульләргә -”сөенче”

Татарстан башкаласында 21 мең 333 үзмәшгуль исәпләнә.

-Узган ел үзмәшгульләрдән Казан бюджетына 24 миллион сум салым түләүләре кергән иде. Россия Федерациясе Президенты Владимир Путин карары нигезендә, бу акчалар узган ел эшчәнлек алыып барган һәм салым түләгән 19 мең үзмәшгульгә кире кайтарыып бирелә,-диде Илдар Шакиров.

Шулай ук, Татарстан Республикасы Президенты Рөстәм Миңнеханов карары буенча, үзмәшгульләр мохтаҗлар категориясенә кертелгән. Коронавирус сәбәбендә, эштән аерылып торган кешеләргә һәм мохтаҗларга республика азык-төлек тупланмасы таратты. Мондый күчтәнәч 3 мең 250 үзмәшгуль һәм шәхси эшкуар балалары өчен дә бирелгән. Илдар Шакиров әйткәнчә, бу атнада Казанда азык-төлек тупланмасының икенче партиясен өләшү башлана.

Үзмәшгульләргә субсидия рәвешендә грантлар әзерләнгән. Конкурс май ахырында игълан ителәчәк.

Дамир Бәдриев
Шәһри Казан
№ --- | 18.05.2020