МАШИНАГА НОМЕРЛАР ...АУКЦИОН АША

Россиянең Юл хәрәкәте иминлеге дәүләт инспекциясе башлыгы Виктор Кирьянов күптән көтелгән гамәлне тормышка ашыруда тагын бер адым ясады. Баш гаишник белдергәнчә, тиздән ЮХИДИ идарәләрендә машинага номерларны сатып алырга мөмкин булачак. Номерларны аукционга да куярга мөмкиннәр.

Барыбызга да билгеле, акчалы кешеләр үзләренең матур машиналарына матур номерлар да алырга тырыша. 001, 002, 222, 555 кебек саннар язылган машиналарда йөрергә һәм башкалардан аерылып торырга ярата алар. Барыбызга да шунысы да билгеле: еш кына андый номерларны алу өчен алар ЮХИДИ хезмәткәрләренә шактый гына суммада акча да төртәләр. Әлеге фактны җитәкчеләр дә инкарь итми.

Бүгенге көндә шундый номерларны алга таба сату турындагы закон проекты әзерләнә икән. "Без моңа каршы түгел. Ошый икән номер - сат та ал, бездән башка гына", - дип белдерде Кирьянов әлеге яңалыкка үз мөнәсәбәтен белдереп. Әлбәттә, әлеге гамәлнең уңай яклары гына булуын инкарь итәргә кирәкми. Беренчедән, номерларны рәсми рәвештә сату ришвәтчелекнең бер формасыннан котылу мөмкинлеге бирәчәк, икенчедән, дәүләт казнасына шактый гына акча да керәчәк. Бу вакытта инде акчаны гаишник кесәсенә салмыйсың.

 Сүз уңаенда, үзенчәлекле машина номерларын сату дөньяның күп кенә илләрендә күптән алып барыла инде. Әйтүләренчә, мондый эш бигрәк тә Берләшкән Гарәп Әмирлекләрендә чәчәк ата, анда номерларны сату бюджетка ел саен берничә миллион доллар китерә икән. Бер генә мисал, 2008 елда 25 яшьлек бер егет үзене "1" саны сугылган номерын аукционнан 14 миллион долларга сатып җибәргән. Аукционга куеп, башлангыч суммасы да аз гына булган үзе: "нибары" 27 мең доллар. Менә шундый хәлләр!