СЕҢЛЕСЕ АБЫЙСЫННАН КАЛЫШМЫЙ

Европа халкына бу көннәрдә футбол җене кагылган булса да, якшәмбе көнне спорт дөньясының тагын бер зур вакыйгасы Парижда чираттагы теннис бәйгесе тәмамлануы белән бәйле булды. Дөньядагы иң кәттә дүрт ярышның берсе булган “Ролан Гаррос”ның хатын-кызлар финалында Динара Сафина да чыгыш ясады. Кызганыч, 22 яшьлек милләттәшебез карьерасында мондый югары дәрәҗәдәге тәүге хәлиткеч уенда Сербия теннисчысы Анна Ивановичка оттырды. әмма ул барыбер тамашачының күңеленә кереп калды. Көчле һәм бер ук вакытта көчсез рухы белән.

Күптән түгел бер мәзәк ишетергә туры килде. Ходай Тәгалә теннисчыларга сәләт өләшкәндә берсенә көч, икенчесенә түземлек, өченчесенә матур итеп уйнау осталыгы биргән. Ә Сафинга чират җиткәч, болай дигән: “Марат, ничек телисең шулай уйна”. Чыннан да бу уенчының ничек чыгыш ясасын беркем дә фаразлый алмый. Теләсә татар егете барысын да җиңә, ә инде булмаса гади генә бәйгенең беренче әйләнешендә үк төшеп кала.

Баксаң, Динара да кайбер яклары белән абыйсына охшаган икән. Парижда узган бәйгедә ул башта Мария Шарапова, аннары Елена Дементьева, соңрак Светлана Кузнецованы, кыскасы, Россия генә түгел, дөньяның да иң көчле уенчылары булып саналган бу өч туташны отты. Абыйсы аркасында аны болай да үз иткән тамашачы Динарага соклануын яшермәде. “Әгәр бер ай элек Берлинда булган зур турнирда җиңәсемне һәм “Ролан Гаррос”ның финалына чыгасымны сезон башланганда әйтсәләр, ул кешене юләр дип санар идем. Бу уңышларым, беренче чиратта, остазымның тырышлыгы, аның ярдәме. Соңгы уенда да өстенлекне үз кулыма алырга тырышыып карадым. әмма көчем бөтенләй калмаган иде. Җитмәсә, мондый зур бәйгенең финалында беренче тапкыр уйнавым”, – дигән ул.

Марат белән Динара бер-берсенең уеннарын сирәк карыйлар икән. 2004 елда шул ук “Ролан Гаррос”та ачуыннан шортын салып ыргыткан абыйсы бу юлы сеңлесенең ни кылануын күрсәме? Соңгы очрашуларда рухи һәм физик көчен югалткан Динара рәхәтләнеп урыс теленең “гүзәл” якларыннан файдаланды. Ә корт читендәге микрофоннар татар кызының сүгенүен бөтен дөньяга ишеттерде. “Кайчак үзем дә арттырып җибәрәм, – дигән Сафина очрашудан соң. – Ракеткаларымны ватам, начар сүзләр кычкырам. Әлбәттә, бу хатын-кызга килешеп бетми. Әмма мине ничек бар шул яратырга өйрәнегез”. Тагын бер мәзәк искә төште әле. Ходай Тәгалә кешеләргә акыл өләшкәндә спортчылар күнегүләрдә булган икән. Шуңа күрә аларның мондый тәртипсезлегенә гаҗәпләнергә кирәкми.