03.02.2020 Спорт

Раяз Фасыйхов “Ак барс” капитаны Данис Зарипов белән яшь хоккейчыларга бүләк тапшырды

Раяз Фасыйхов яшь хоккейчыларга кәшәкә бүләк итү тантанасында катнашты. “Ак барс” хоккей командасы капитаны, өчләтә Дөнья чемпионы, бишләтә Гагарин кубогы иясе, атказанган спорт мастеры һәм КХЛның иң яхшы һөҗүмчеләреннән булган Данис Зарипов белән җырчы Раяз Фасыйхов һәм аның дусты Марат Питрәч балаларына чын бәйрәм ясады.

Балаларны кызыксындыру максаты белән җырчы Раяз Фасыйхов балаларга танылган хоккейчы белән очрашу, аның кулыннан бүләк алу мөмкинлеге бүләк итте. Әлеге чарада Питрәч районы хакимияте башлыгы Илһам Кашапов та катнашты.

“Питрәч – 2010” командасына Марат дустым “Заряд” кәшәкәләре сатып алган иде. Ул командада аның улы да уйный. Мин әлеге кәшәкә тапшыру тантанасын чын бәйрәм итәсем килеп, дустым Данис Зариповтан, Питрәчкә үзе кайтып балаларга кәшәкәләрне тапшыруын үтендем. Эше күп булып, тыгыз вакытлары булса да, Данис вакыт табып кайтып, балаларны куандырды. Танылган хоккейчыны күрүгә балаларның күзләре ялкынланды, бик горур кул биреп күрештеләр. Хәзер уйнаулары да бөтенләй башкача булыр”, - диде Раяз Фасыйхов.

"Матбугат.ру"га мәгълүм булганча, танылган хоккейчы белән очрашу моның белән генә төгәлләнми, аны балалар һәм әти-әниләре уратып алып, автограф алырга һәм фотога төшәргә чират торалар.

---
Раяз Фасихов
№ --- | 03.02.2020