09.01.2020 Әдәбият

Айдар Хәлимнең яңа китабы дөнья күрде: “Тарихта бердәнбер шундый китап түгелме икән...”

Татар һәм башкорт язучысы, шагыйрь, драматург Айдар Хәлимнең өр-яңа китабы дөнья күрде. Автор сүзләренчә, бу бик сирәк, хәтта тарихта бердәнбер шундый китап. Инстаграмда урнаштырылган видеоязмада автор үз китабына кыскача аннотация бирә.

“Менә бер китап. Исеме бик гади - ”Әйдисез, дәшәсез!”. Исеме гади булса да, эчтәлеге белән бик гади түгел ул, хәтта мин әйтер идем катлаулы дип. Ул сирәк китап. Хәтта тарихта бердәнбер шундый китап түгелме икән, дигән уй да туа. Чөнки бер кешегә багышланган, багышлаулардан гына торган китапларны әле минем күргәнем юк та шикелле. Алар, әлбәттә, бардыр.

Бу китапта беренче тапкыр каләм тибрәтүчеләр белән бергә күренекле шагыйрьләр дә урын алган. Алар арасында Гамил Афзал, Илдар Юзеев, Рәшит Әхмәтҗанов, Равил Фәйзуллин Фәрит Габдерәхим, Рим Идиятуллин, Гәрәй Рәхим, Рәзил Вәлиев кебек шагыйрьләр бу китапның үренә менеп урын алганнар.

Безнең бу китапта тагын бер үзенчәлек: ул да булса, бер кешегә багышланган булса да, шул кешегә багышлану сәбәп кенә булып тора. Шигырь язган кешенең үзенә кайтып кала, аның язмышына кайтып кала. Чөнки һәркем үзенең зарын, үзенең кайгысын, туры сүзлелеген әйтергә тырыша. Бу туры сүзле кешеләр китабы дип тә әйтергә мөмкин. Сиксәнләп шагыйрьнең туксанлап шигыре басылган. Менә сезгә “Әйдисез, дәшәсез!” дигән китапның кыскача эчтәлеге. Әйе, без шигърияткә әйдибез, дәшәбез!” – дип сөйли Айдар Хәлим видеоязмада.