Күсе елын каршы алганда табында ни булырга тиеш?

 

– итнең майсыз төрләре – бозау яки сыер, тавык яки күркә ите;

 

– ветчина, казылык һәм ысланган балык;

 

– парда пешерелгән яшелчәләр;

 

– диңгез балыгы;

 

– көрпәле икмәк;

 

– тәм-томнар һәм десертлар;

 

– җиләк-җимеш;

 

– алкогольсез яки аз алкогольле эчемлекләр;

 

– укроп, салат яфраклары;

 

– чикләвек;

 

– үлән яки җиләк-җимеш чәе.

 

 

– итнең майлы сортлары – сарык яки дуңгыз, үрдәк яки каз ите;

 

– тропик җиләк-җимеш;

 

– кәбестә;

 

– каты хәмер эчемлекләре;

 

– каһвә.

 

Күселәр бөтен ризыкны да үз итә, әмма азыкның туклыклы булуы мөһим. Күпләр өстәлдә сыр булырга тиеш дип саный. Әлбәттә, кимерүче мондый продуктны ярата, тик аның белән сак булырга кирәк, чөнки сырның барлык төрләре дә тәме буенча күсегә туры килми. Һәм, барыннан да элек, бу кискен исе булган, кимерүчеләрне куркыткан сыр продуктларына кагыла. Бу сырларның рокфор, бри, камамбер кебек төрләре. Брынза, фета, адыгей, рикотта кебек нейтраль тәмле сырларга өстенлек бирү яхшырак.

 

«ЯҢА ЕЛ» САЛАТЫ РЕЦЕПТЫ

 

Салат өчен 150 грамм какланган тавык ите, 200 грамм шампиньон, 100 грамм кореяча кишер, 150 грамм яшел кыяр, 80 грамм караҗимеш, майонез, тоз, борыч, петрушка, укроп кирәк. Салат катлам-катлам итеп ясала.

 

Тавык итен тозлы суда пешерәбез, суынгач, вак итеп турыйбыз. Бу – салатның беренче катламы.

 

Икенче катлам итеп вак кына туралган караҗимеш салына. Өченче катламга салачак шампиньоннарны үсемлек маенда кыздырып алабыз. Кыярны вак шакмакларга турыйбыз. Кореяча кишерне үзең ясасаң да, сатып алсаң да була. Һәр катлам өстенә юка итеп кенә майонез сылыйбыз.

 

Әлеге салатны тирән түгәрәк савытка катламлап салыгыз һәм суыткычка куегыз. Ярты сәгатьтән соң, савытны әйләндереп, киң тәлинкәгә салатны каплап салыгыз.

 

Тагын да матур булсын, дисәгез, салатны укроп, петрушка белән бизәргә мөмкин.

 

«БИК ТӘМЛЕ» РУЛЕТЫ

 

Бу рулетны әзерләү өчен 1 килограмм тавык ите, 50 грамм караҗимеш, 25 грамм сарымсак, йомырка, тоз һәм борыч кирәк булачак.

 

Чистартылган тавыкны буйга ярып, итен сөягеннән аералар. Аннары җиңелчә генә суккалап йомшартырга, тоз һәм борыч сибеп, сарымсак сөртергә.

 

Караҗимешне суда җебетеп, төшен алырга.

 

Юка итеп кенә йомырка җәймәсе әзерләргә. Өстенә әзер итне, шуннан туралган караҗимешне салырга һәм рулет итеп төреп, җеп белән бәйләп чыгарга кирәк.

 

Рулетны тавык сөягеннән әзерләнгән шулпада 40-60 минут пешерергә һәм шунда суытырга. Түгәрәкләп киселгән рулетны табынга гарнир һәм яшелчәләр белән бизәп чыгаралар.

 

БАНАНЛЫ ТОРТ

 

Торт өчен 1 стакан он, 2 стакан шикәр комы, 4 йомырка, 2 стакан каймак, 3-4 банан, 1 бал кашыгы разрыхлитель, 5 грамм ванилин кирәк булачак.

 

Бу торт банан яратучыларга ошаячак. Өстәвенә, торт пешерү күп вакытны сарыф итми.

 

Бисквит ясау өчен йомырка белән шикәр комын кушып, 10 минут болгатабыз. Аннары он һәм разрыхлительны кушабыз һәм болгатабыз. Камыр куе каймак консистенциясе булырга тиеш.

 

Табаны майлыйбыз һәм килеп чыккан камырны шунда агызабыз. Аны 180 градус температурадагы духовкада 25 минут пешерәбез. Әзер булгач, суытабыз һәм яртылаш кисәбез.

 

Крем өчен каймак һәм шикәр комын кушып, болгатабыз. Беренче кат бисквитка җәябез. Өстенә юка итеп киселгән банан кисәкләрен тезәбез. Өстенә кабат крем агызабыз һәм бисквитның икенче өлешен каплыйбыз. Өстенә кабат крем сылыйбыз. Әзер тортны 4-5 сәгатькә суыткычка куябыз.

 

Рәйдә НИГЪМӘТҖАНОВА, Безнең гәҗит