27.11.2019 Мәдәният

"Мир" кинотеатрында ажиотаж дәвам итә

«Кино+Театр» республика акциясе "Мир" кинотеатры тамашачылары арасында ажиотаж тудырды. Акция кысаларында күрсәтелгән Камал театры спектакльләре зур кызыксыну уятты.

Исегезгә төшерәбез, «Кино+Театр» акциясе Казанда 6 октябрьдә старт алды. Чара «Татаркино» дәүләт бюджет мәдәният учреждениесе тарафыннан Г.Камал татар дәүләт академия театры белән берлектә Россиядә Театр елы кысаларында оештырылды.

Бу проект ярдәмендә берничә ай дәвамында Камал театрының иң яхшы спектакльләре күрсәтелде. Спектакльләрне трансляцияләү генә түгел, тамашачыларның Камал театры актерлары белән аралашуы да оештырылды. Россия һәм Татарстанның халык һәм атказанган артистлары Равил Шәрәфиев, Искәндәр Хәйруллин, Айдар Хафизов, Әзһәр Шакиров, Алсу Гайнуллина, Рузия Мотыйгуллина, Радик Бариев, Дания Нуруллина, Илсөя Төхвәтуллина, Фәнис Җиһаншин һ. б. акция кысаларында тамашачылар белән хатирәләре белән уртаклаштылар.

Татар спектакльләрен 1,5 меңгә якын тамашачы карады.

Тамашачылар соравы буенча акцияне дәвам итү турында карар кабул ителде. Өстәмә сеанслар «Мир» кинотеатрында якшәмбе көннәрендә 14:00 сәгатьтә башлана.

1 декабрьдә кинотеатрда «Әлдермештән Әлмәндәр» спектакле тәкъдим ителәчәк.

8 декабрьдә «Курчак туе» спектаклен карарга мөмкин булачак.

15 декабрьдә зур экранда «Үлеп яратты» спектакле күрсәтеләчәк.

---
Татаркино
№ --- | 27.11.2019