25.11.2019 Мәдәният

Филүс Каһиров хатыны белән дуэт җырлаячакмы? Җавапны үзе әйтә

Җырчы Филүс Каһиров кечкенә чактан җырлый. Әмма бик оялчан була. Талантын сизеп, тәрбиячеләр балалар бакчасында ук аны җырлата башлый.

— Кызарып, үземне кая куярга белмичә, идәнгә карап җырлый идем, — дип көлеп искә ала Филүс. Җырчы булырга хыялланган егет 10 елдан артык шушы һөнәрне үзләштерә: Октябрьский музыка училищесында, Казан дәүләт консерваториясендә укый, аннан аспирантура... Хәзер Филүс — үзе укытучы!..

— Быел Американы гөрләтеп кайттыгыз. Башка илләргә тагын шундый тур оештыру күздә тотылмыймы?

— Аллага шөкер, Американы әйбәт кенә урап кайттык. Дөрес, физик яктан җиңел түгел. Акклиматизация, сәгать аермасы, һава торышы да бүтән... Иҗатыбызны андагы милләттәшләргә күрсәтергә, дигән көчле теләк бөтенесен дә җиңеп чыгарга ярдәм итте. Киләсе елга Европа илләренә барырга ниятлибез, Алла боерса. Ел саен шундый бер иҗадый сәфәр оештырырга, дигән теләк белән яшибез...

— Эльмира белән ничек танышкан идегез?

— Хатыным Башкортстанның Октябрьский шәһәреннән. Әти-әнисе чыгышлары белән Ярмәкәй районының Иске Турай авылыннан. Туйга хәтле 9 ел очрашып йөрдек. 2013 елда өйләнештек. Бергә яшәвебезгә җиденче ел китте...

— Концертларда гел бергә йөрисез. Оештыру эшләрен Эльмира алып барамы?

— Төркемнең директоры да, режиссеры, продюсерым да... — хатыным! Бөтен эшне икәү башкарабыз. Программаны төзегәндә, җырлар сайлаганда да бергә, репетицияләр дә аннан башка узмый... Хатыныма зур рәхмәт! Иҗадый яктан да ул — иң ышанычлы терәгем.

— Бергә җырлаган видеоларыгызны күргәләдек. Сәхнәгә дуэт булып чыгарга теләмисезме?

— Юк. Аны кызык өчен генә яздырдык. Әйткәнемчә, Эльмира концерт оештыру эшләренә чумган. Сәхнәгә чыгып җырлау турында уйлаганы юк.

— Улларыгызның нинди талантлары бар? Әтиләренең микрофонына үреләләрме?

— Олы улыбыз Айдарга — 5, кечкенәсе Рөстәмгә 2 яшь. Чыгыш ясаганымны күргәч, микрофонга сузылалар. Шуңа уенчык микрофон алып бирдек. Җырлап йөргән булалар инде. Әлегә бу яктан талантлары бар, дип әйтергә иртәрәктер. Әмма күңелләре тарта, күренеп тора. Концерт куйганда сәхнәгә чыгасылары килә. Үсә төшкәч, нинди юнәлеш сайларга икәнен үзләре хәл итәр. Мәҗбүриләргә ярамый. Безнең бурыч — аларга терәк булу, булышу.

Лилия ЙОСЫПОВА
Ирек мәйданы
№ --- | 25.11.2019