08.09.2019 Җәмгыять

Меңәрләгән кеше үсмерне үлемнән коткарып кала

Британиянең Зур Манчестер графлыгындагы Болтон шәһәрендә бер малай бик авыр чирдән интегә. Көннәрдән беркөнне ул таныш булмаган кешеләрдән 3 меңнән артык открытка ала. 13 яшьлек Рис Уильямс (Rhys Williams) буллез эпидермолиз авыруыннан интегә. Тумыштан килгән бу чир нәтиҗәсендә тән тиресе бик тиз яраланучан һәм җәрәхәтләнүчән була.

Хәтта кием кигән вакытта да тән тиресе бозыла, кабарып чыга, эрозияләр барлыкка килә. Тирегә зыян килмәсен өчен кул-аякларны бинт белән урарга туры килә. Су җыелган шешләрне даими җентекләп эшкәртү кирәк, югыйсә алар чиләнеп торган ярага әйләнәчәк.

Ниндидер моментта үсмер көне-төне бәйләвечләрдә йөрүдән арыган да, суицид хакында уйлана башлаган. Әнисенә дә бу хакта әйткән. Куркынган ана малаен дәртләндерү ысулы уйлап тапкан. Ул үзенең Facebook кулланучыларын малайның 14 яшенә открыткалар җибәрүне сораган.

Пост тиз арада вируслыга әйләнә, берничә көн эчендә малайга бөтен дөньядан (хәтта Катар, Чили, АКШтан) 3 меңнән артык открытка килә. Алар шулкадәр күп була ки, Уильямслар йортына бары тик шушы Рис өчен генә тәгаенләнгән хатлар тулы почта фургоны җибәрәләр.

Рисның әнисе Таня (Tanya) улының чиксез бәхетле булуын белдерә. Рис дусты белән һәрбер открытканы укыган. “Искитмәле хәл. Миңа Facebook-та һаман меңәрләгән хәбәрләр килә, кешеләр ишек төбенә открыткалар салып китә, улым Риска хатлар тулы бер почта фургоны килде”, - ди күңеле тулган әни кеше.

Сәламәт кешеләр никадәр бәхетле икәнлекләрен һәм кайчагында таныш булмаган кешене дә дәртләндереп, куркыныч адымнан саклый алганнарын аңласын иде. Бер җылы сүз җитә... Онытмагыз шуны...

Автор : Шакирҗанова Әлфия

Чыганак: Lenta.ru

Фото: Tanya Williams-ның Facebook-тагы битеннән.

---
Өмет
№ --- | 08.09.2019