КАЗАН – 2013 ЕЛГЫ УНИВЕРСИАДА БАШКАЛАСЫ, ЯКИ МЕДВЕДЕВ ТАЛИСМАНМЫ?

Без бу җиңү көнен ким дигәндә ике ел көттек. Һәм, ниһаять, 31 май Брюссельда, Мәскәү вакыты унберенче киткәндә барлык шәһәр халкы диярлек телевизор экраннары каршында Казан өчен дога кылып утыргандыр, мөгаен. ФИСУ җитәкчесе конверттагы җиңүче исемен укып, безнең делегация вәкилләре сәхнәгә чыкканнан соң, Брюссельда татарча “Хәерле кич, хөрмәтле дуслар!” дигән сүзләр яңгырады. “Казан-2013” Универсиада сайлау алды кампаниясенең башында торган премьер-министр Рөстәм Миңнеханов җиңүнең, чыннан да, бик авыр бирелгәнен искәртеп үтте.

Әйе, 2011 елгы Универсиаданы Татарстан башкаласында үткәрү өчен нибары ике тавыш кына җитмәгән иде. Шәһәр башлыгы Илсур Метшин әйтүенчә, әлеге күренеш безне тагын да көчлерәк, кырысрак, башка кандидат шәһәрләргә карата куркыныч коралга әйләндерде. Аннары, быел “җиңмәсәк, үз кандидатурабызны алдагы елларда да куячакбыз” дигән сүзләрне дә ишетмәдек. Универсиаданың бездә узачагы шик тудырмагандыр, күрәсең.

Студентлар спорты ярышын үткәрү хокукы Казанга бирелүе шәһәр өчен генә түгел, Россия өчен дә зур дәрәҗә дигән сүзләрне еш ишетергә туры килә. Яңа Президентыбыз Д.Медведев илнең бәхетле талисманына әйләнеп бара бугай. Уйлап кына карагыз, ул ил җитәкчесе булуына бер ай да үтмәде, “Зенит” УЕФА кубогын отты, 15 ел җиңү күрмәгән Россия хоккей җыелма командасы чемпион калды, шуңа “Евровидение”да җиңүне кушсак, хәзер менә Казан да дөньякүләм аренада танылды.

Ни дисәк тә, Казан Олимпия уеннарыннан соң популярлык буенча икенче урында торучы студентлар ярышын үзендә үткәрү өчен барлык көчләрен дә куйды. Иң мөһиме, моны, гадәттәгечә, җитәкчелек кенә түгел, ә шәһәр халкы да хуплап алган иде. Бигрәк тә Казан югары уку йортлары студентларының активлыгын билгеләп үтәргә кирәк.

Шул рәвешле, 2013 елны көтәбез, җәмәгать. Бергә җиңеп, Универсиаданы бергә матур гына үткәреп тә җибәрергә кирәклеген онытмаска кирәк.