КӘРИМ ТИНЧУРИН ТЕАТРЫ АЧЫЛА!

14 майда 18.00 сәгатьтә Кәрим Тинчурин театрының официаль рәвештә капиталь ремонттан соң ачылу тантанасы була. Чын сәнгать сарае булган, яңартылган затлы театр бинасында яратып, зарыгып көтеп алган тамашачыларыбызны театральләштерелгән концерт-тамашага чакырабыз.

Бинабызга төзекләндерү эшләре барганда без һәрвакыт юлда булдык, безне көтеп алган, яраткан тамашачыбыз белән очрашып яшәдек. Шушы вакыт эчендә бөтен Татарстанны әйләнеп чыктык. Мәскәү, Санкт-Петербург, Оренбург, Уфа һ.б. калаларында булдык. Дүрт тапкыр гына Урал-Себерне аркылыга-буйга поезд белән дә, автобус белән дә гизеп милләттәшләребезгә театрыбызның иң яхшы спектакльләрен күрсәттек.

Театр бинасын реконструкцияләү өчен республика бюджетыннан 180 млн. сум акча бүленеп бирелде. Бина тулысы белән яңартылган дияргә була. Бары тик стеналары гына шул килеш калды. Чехиядән 36 искиткеч матур люстра, Германиядән яңа паласлар кайтарылып җәелде. Сәхнә, тамашачыларга яхшырак күренсен өчен махсус күтәртелде, залның теләсә кайсы почмагыннан да аны карау мөмкинлеге бар.

Сезнең өчен, хөрмәтле тамашачылар, бар уңайлыклар да тудырылган.

Спектакльләребезгә рәхим итегез! Без сезне сагындык!