Казанда композитор Илгиз Мәҗитовка мемориал такта ачылды (ФОТО)

Тантаналы чара композиторның популяр әсәрләренең берсе – Илһам Шакиров язмасында  Илгиз Мәҗитовның  Дамир Гыйсметдинов  сүзләренә язган «Очып кайтам» җыры белән башланды.

 

 

Татарстанның Беренче Президенты, Татарстан Республикасы Дәүләт Киңәшчесе  Минтимер Шәрип улы Шәймиев үз чыгышында Илгиз Мәҗитовның татар музыка сәнгатенә керткән зур өлеше, опера театрында, филармониядә эшләгән елларындагы  бәһасез хезмәтләре хакында искә алды.

 

 

Истәлекле такта ачу тантанасында чыгыш ясаган Татарстан Республикасы Президенты каршындагы Мәдәниятне үстерүгә ярдәм күрсәтү фондының башкарма директоры Нурия Хашимова,  Россиянең һәм Татарстанның халык артисты, Г.Тукай исемендәге дәүләт премиясе лауреаты Зилә Сөнгатуллинага, Россиянең атказанган, Татарстанның халык артисты Эмиль Җәләлетдинов, Россиянең атказанган, Татарстанның халык артисты, Г.Тукай премиясе лауреаты Айдар Фәйзрахманов,Татарстанның халык артисты Рәшит Сабиров күренекле сәнгать  әһелләренең исемнәрен мәңгеләштерүдә мондый чараларның әһәмиятлелеген ассызыкладылар, Илгиз Мәҗитовның шәхесе татар халкы өчен никадәр кадерле булуы хакында сөйләделәр. Илгиз Мәҗитовның хәләл җефете Галина ханым мемориал такта ачуда ярдәм иткән, хезмәте кергән һәркемгә рәхмәт сүзләрен җиткерде.

 

 

Күренекле композитор истәлегенә такта ачу тантанасы аның Дамир Гыйсметдинов сүзләренә язган, халык арасында зур популярлык казанган «Гомер уза» җыры белән тәмамланды. Җыр  Зилә Сөнгатуллина язмасында яңгырады.

 

Мемориал тактаның авторы – скульптор  Фәнил Вәлиуллин.