300гә якын кеше Татарстанның Халыклар дуслыгы йортында Тоталь диктант язды

Татарстанның Халыклар дуслыгы йортында узган акциянең диктаторлары ТР Дәүләт Советы депутаты Анастасия Исаева, Татарстан халыклары яшьләр Ассамблеясе рәисе Тимур Кадыйров һәм Татарстанның халык артисты Илья Славутский булдылар.

 

Тимур Кадыйров TRuD чит ил студентлары мәйданчыгы диктаторы булды. Ике мәйданчыкта катнашучылар гадәти диктант язсалар, чит ил студентлары өчен тест һәм төп текстның бер өлешеннән торган махсус биремнәр әзерләнгән иде. Әлеге мәйданчыкта Тоталь диктантны Урта Азия, Венгрия, Франция, Колумбия, Йемен һәм Шри-Ланка илләре вәкилләре язды.

 

Акциянең даими катнашучылары быелгы тексның берьюлы җиңел дә, катлаулы да булуын әйттеләр. Шулай ук аның кызыклы темасын да аереп әйттеләр — театр елы уңаеннан текст М. Горькийның «На дне» әсәренә багышланган иде.

 

Әмма яңа катнашучылар өчен диктант чагыштырмача авыр булган.

 

«Бик кызыклы булды, ләкин катлаулы. Моңа кадәр оештыручылар арасында булсам да, диктантны мин беренче тапкыр яздым. Акция бик кирәкле һәм файдалы. «Тоталь диктант» башка телләр арасында да шундый юнәлешкә этәргеч бирде: хәзер бөтен ил буйлап татар, мордва, мари, удмурт, бурят, немец һәм башка телләрдә диктант язалар. Мондый акциянең популярлыгы шундый чараларның мөһим булуын дәлилли», — дип сөйләде ТР удмуртларының милли-мәдәни автономиясе рәисе ярдәмчесе Марина Иванова.

 

Республика акция уздыруда быел яңа рекорд куйды: Татарстан буенча диктантны барлык муниципаль берәмлекләрдә барлыгы 80нән артык мәйданчыкта яздылар.

 

Белем бирү акциясенең нәтиҗәләре 17 апрельдән соң «Тоталь диктант»ның рәсми сайтында эленәчәк.