ХАЛЫК ӨЧЕН КҮПНЕ ЭШЛӘП БУЛА, ҖАНДА МИЛЛӘТ РУХЫ ЯШӘСӘ

Алдан игълан иткән идек ­ 25 апрельдә Түбән Новгородның Тимер юлчылар мәдәният сараенда Түбән Новгород өлкәсе татарларының III корылтае булачак. Анда өлкәбезнең татарлар күмәк яшәгән районнарыннан, шәһәрләрдән килгән делегатлар каршыбызга заман куйган иң актуаль мәсьәләләр буенча фикер алышырлар.

Өлкәбездә милли съездлар үткәрүне илебездә демократик үзгәрешләр башлану чорында “Туган як” оешмасы традициягә керткән иде. Бүгенге җыенның инициаторы булып та “Туган як” чыкты һәм бүгенге корылтайда өлкә “Туган як” милли-мәдәни оешмабызның 20 еллыгына багышлана.

 Корылтайда уртага салып сөйләшерлек мәсьәләләр байтак. Шуларның иң мөһимнәре – гаилә, балалар бакчалары, мәктәп, җәмгый оешмалар көче белән заманыбызның тискәр йогынтысына каршы торуы,ана телебезне, татарлыгыбызны саклау.

 Авылларны саклап калу, яңа эш урыннары булдыру, яшь кадрлар әзерләү, халкыбызның милли культурасын, рухи байлыгын үстерү дә бик актуаль булып кала.

 Безгә күптән инде Түбән Новгород өлкәсе татарларының культурасын, рухи байлыгын саклау һәм үстерү программасын төзеп өлкә хөкүмәтенә тәкъдим итәсе бар.

 Бүгенге глобальләшү заманы тормышыбызга һәр көн үзгәрешләр кертә. Шунда безгә югалып калмаска, күктән төшкәнне көтеп утырмаска, ә чын татар характеры күрсәтергә, үзгәртеп коруларның алгы сафында булырга тырышырга кирәк.

 Бергә булыйк, бердәм булыйк, якташлар!