ТИНЧУРИНЛЫЛАР СЕБЕРДӘН КАЙТТЫ

22 апрель көнне Кәрим Тинчурин театры артистлары салкын Себер якларыннан гастрольләрдән кайттылар.

4 апрельдән 21нә кадәр 17 шәһәрдә чыгыш ясадылар алар. Театрыбыз директоры Фәнис Наилович Мөсәгыйтов тырышлыгы белән 2006 елдан бирле Себер яклары белән Тинчурин театры арасында дуслык мөнәсәбәтләре урнаштырылды. Былтыр 2009 елда, мәсәлән, ике тапкыр: март һәм август айларында гастрольләр оештырылган иде. Быел маршрут “Себер-2010” дип аталды һәм монда Ижау, Пермь өлкәсе Кунгур поселогы, Екатеринбург, Төмән, Омск, Куйбышев, Томск, Ачинск, Лесосибирск, Красноярск, Кемерово, Юрга, Новосибирск, Чаны, Аслана, Чиләбе, Уфа шәһәрләрендә спектакльләр куелды.

Әлеге гастроль Бөек Җиңүнең 65 еллыгына багышланып куелган һәм спектакльнең үзәк темасы да – сугыш афәте. Россиянең атказанган, Татарстанның халык артисты Исламия Мәхмүтованың “Син бит минем бергенәм” моңсу комедиясе иде ул.

Һәрбер спектакльгә сугыш, тыл ветераннары кунак буларак чакырылды. Театр тарафыннан аларга бүләкләр тапшырылды, Ватаныбызга күрсәткән батырлыклары өчен зур рәхмәтләр әйтелде.

“Син бит минем бергенәм” спектаклен тамашачылар я көлеп, я күз яшьләрен түгеп, тын да алмыйча карадылар. Һәрбер шәһәрдә дә тамашачылар аягүрә торып озак алкышладылар, дуслык-туганлык тойгысы тәэсирендә озак аерыла алмадылар бер-берләреннән.

Россиянең атказанган, Татарстанның халык артисты Исламия Мәхмүтова, Татарстанның атказанган артистлары: Алинә ролен башкарган Лилия Мәхмүтова, Айнур ролен башкарган Ринат Шәмсетдиновны, Әкълимәне - Люция Галләмова, Сабирны – Татарстанның халык артисты Зөфәр Харисов, яшь артистлар Чулпан белән Айдар ролен башкарган Гөлназ Нәүмәтова белән Фернат Насибуллин күңелгә үтеп керерлек итеп тирән ачып күрсәттеләр үз рольләрен.

Безнең иҗади коллективка афәрин диям, үз рольләрен яхшы гына башкарып чыктылар. Моңа тамашачыларның кайнар алкышлары, кочак-кочак чәчәкләре, җитәкчеләр тарафыннан тапшырылган мактау кәгазьләре, дипломнары дәлил.