25.04.2010 Милләт

“ТАТАР ДОЗОР” УЕНЫННАН ФОТОРЕПОРТАЖ

24 апрель “Татар дозор” уен-маҗара узды. 6 команда катнашты, һәрберсендә 10 шар кеше. Әле бу уен турында ишетеп Питрәчтән дә 20ләп бала килеп төште. Кире борып җибәрмәдек, алар да командаларга кушылып Казанны татарча сөйләштереп йөрде.

Сәгать 12.00дә командаларга мөһерләнгән конвертлар бирелде. Беренче биремдә Г.Тукай, С.Сәйдәшев, М.Җәлил, Су анасы, яшь Ленин, Бутлеров һәйкәлләренә барып, Тукайның шигырьләрен сәнгатьле итеп укырга кирәк иде.

Бу биремне үткәч, бәйгенең иң авыр өлеше башланды. Казан үзәге 6 секторга бүленеп, командалар тәгаенләнгән маршрут буенча юнәлде. Уенда катнашучылар кибет, кафе, сәүдә нокталарына кереп, сатучыларның татарча сөйләшүләрен тикшерергә, элмә такталарда, кулланучылар почмагындагы мәгълүмат ике телдә дә язылганын тикшерергә, жалу кенәгесен сорап, теләкләрен язарга, татар телендә хезмәт күрсәткән урыннарда “Мин татарча сөйләшәм!” логотибы төшерелгән ябыштыргычны беркетергә кирәк иде. Яшьләрнең күбесе акциянең максатын аңлата алды, республикада ике дәүләт теле кулланышта булганын исләренә төшереде, каршы торучылар белән аяк терәп сөйләшә белделәр.

Өченче бирем – “Мин татарча сөйләшәм!” логотибы төшерелгән 3 футболка сату. Сәүдә итү татарның канына сеңгән, күрәсең, бу бирем “ә” дигәнче үтәлде.

Дүртенче конвертта иң якын тукталышка килеп, Печән базары, Мәрҗәни мәчете, Ханнар төрбәсе, Тукай музее, Кабан күле, Мөхәммәдия мәдрәсесе янына ничек барып җитәргә мөмкин булуын сорарга кирәк дип язылган иде. Җәмәгать транспортына кергәч, автобусларда тукталышлар ике телдә игълан ителәме, юкмы, транспортта йөрү кагыйдәләре ике телгә дә тәрҗемә ителгәнен, кондуктор дәүләт теллеләрен ни кадәр камил белгәнен ачыкларга кирәк иде. Татарча белмәгән кондукторга шелтә белдерү дә биремнең шарты булды. Халык та, автобус йөртүчеләр дә Печән базарын кайда икәнен белә булып чыкты, димәк, аны Киров урамы тукталышы дип атау артык, тарихи исемен кулланышка кертеп җибәрергә кирәк!

Һәрбер команда Казанның тарихи урыннарына бәйле кызыклы мәгълүмат тупларга, үтеп баручыларга (Мәрҗәни мәчете, Тукай музее, Кабан күле, Ханнар төрбәсе, Мөхәммәдия мәдрәсәсе, Печән базары) экскурссия оештырырга тиеш иде. Шунысын әйтергә, алдан ныкап әзерләнгән командалар булды, алар бик кызыклы фактларны кешеләргә ирештерде. Ләкин шул ук вакытта кайсыберәүләр үзеләре дә истәлекле урын кайда булганын төгәл белми азапланды, үтеп баручылар квестта катнашучылардан күбрәк хәбәрдәр икәне ачыкланды. Ләкин шул ук вакытта безнең яшьләр инглизлеләргә дә, гарәпләргә дә аларның телләрендә җиңел аралаша алуларын күрсәтте. КДУның гарәп теле белгечләре туган телебезне генә түгел, ә инглизчәне, гарәпчәне дә су кебек эчәләр. Австралия кунагы урысча аңласа да, алар урысчага күчмичә Кабан күле турында инглизчә сөйләде, кунакны берничә татар сүзенә дә өйрәтергә өлгерделәр.

Иң соңгы конвертта Бауман урамына килеп, халыкны татарча биергә өйрәтергә дип язылган иде. Бауман бу көнне татарча сөйләшүче, биюче, җырлаучы яшьләр белән тулды.

Урыннар билгеләнде! Командаларны бүләкләү иртәгә, 26 апрель Бауман урамында “Мин татарча сөйләшәм!” акциясе вакытында игълан ителәчәк!

Башлана 15.00дә.

“Үзебез” яңа буын хәрәкәте катнашучыларга зуууур рәхмәт белдерә.