“КҮЧТӘНӘЧ” – “АФӘРИН!”

“Татарстан – Яңа Гасыр” телерадиокомпаниясенең балалар өчен чыгып килүче “Күчтәнәч” тапшыруы “ТЭФИ РЕГИОН – 2009” Бөтенроссия телевизион конкурсында “Балалар өчен тапшырулар” номинациясендә җиңү яулады. Җиңүчеләрне 22нче апрель көнне Калининград өлкәсе Светлогорск шәһәрендә бүләкләделәр. Конкурсның финал өлешендә “Күчтәнәч” тапшыруының көндәшләре Краснодар шәһәренең “Шустрое утро” һәм Төмән шәһәренең “Зебра” тапшырулары иде. Ләкин тылсымлы Яңа ел маҗараларыннан торган ТНВның “Күчтәнәч”е Бөтенроссия телевизион Академиясе жюри әгъзаларын әсир итте һәм иң-иң яхшылардан дип танылды.

“Күчтәнәч” “Татарстан – Яңа Гасыр” телевизион каналында инде 6 ел эфирга чыга. Аның даими алып баручылары – Дәү әни, Дәү әти, Йомшаккай һәм Ак тәпи. Әлеге тапшыруның тәрбияви роле зур. Өстәвенә нәни тамашачылар төрле кул эшләренә дә өйрәнәләр, студиягә килгән сәләтле балалар белән танышалар һәм үзләренең яраткан мультфильмнарын татар телендә карыйлар.

Тапшыруның редакторы балаларны үлеп яратучы – Резедә Хәсәнова. “Орфей” статуэткасын Казанга балалар һәм яшьләр тапшырулары иҗат берләшмәсенең җитәкчесе Рамилә Сәхабетдинова алып кайтачак. Аның кайтуын балалар редакциясе генә түгел, бөтен телевидение хезмәткәрләре түземсезлек белән көтә.