Татарча солянка концерты: бәйрәм һәм “любовник” турында уйланулар

Кич буе тамашага Айваз Садыров белән Рамил Шәрәфиев тон биреп торды. Егетләр буйдаклар рәтендә йөри. Шуңа флюидларын әле беренче рәттә утыручы туташларга, әле арттарак утыручы яшь кызларга тараттылар.

 

Концертны Римма Никитина ачып җибәрде. Җырчының сәхнәдә берәр киемен салып ата торган гадәте бар диләр. Бу юлы Филармония тамашачысының зәвыгын истә тотты – туфлиләрен салу белән генә чикләнде. Ә менә иҗатына тел-теш тидерерлек түгел. Римма эшенә йөз процент бирелгән - иң дәртле биюләре белән кунакларга заряд биреп китте.

 

Риммадан эстафетаны алган Раяз сәхнәдә үзен тыйнак тотты. Әллә мин дә ботинкамны салыйммы соң, дип шаярып алды да, залны җыр-моңнарына күмде. Сәхнәгә ак яулыклы әбиең менеп үзен мактап та төште: җылы сүзләрен әйтеп, чәчәкләрен тапшырды. Әбиең бик тәҗрибәле булып чыкты. Тамашачыларга кул болгап, үзенә тигән алкышларын да алып төшеп китте.

 

Татарча солянка бәйрәмнәр марафонын ачып җибәрә. Алып баручылар артистларның бәйрәмне ничек уздыруларын тәмләп сөйләп торды. Яшь әти Илшат Хәмәдиевка, мәсәлән, гашыйклар көнен искә төшерделәр. Баксаң, узган ел ул хатынын бик оригиналь котлаган: кызының тәненә марганцовка белән мәхәббәт сүзләре язып куйган.

 

Ватанны саклаучылар көнен дә читләп узмадылар. Рамил, миңа Мессиның кулы куелган футболка, футбол чемпионатын карау булачак дип башлаган иде, егетнең нибары татлы төшен сөйли икәне ачыкланды...

 

8 мартка алып баручылар иң яхшы бүләк Ринат Рахматуллин диештеләр. Хатын-кызлар мондый перспективага бик шат идеме, Ринат иҗатына бик сусаганнармы, тамашачы җырчыны аеруча кайнар каршы алды.

 

Ә менә Рамазановлар сәхнәдә гашыйклар көненең репетициясен үк оештырды. Башта бер парны сайлап алып үбештереп карадылар. Ошаса, сольный концертыбызга билет бирәбез дигәннәр иде. Ошавын-ошады, кесәдә билет кына юк булып чыкты. Нишләргә? Ризат залогка ни калдырырга белми аптырады. Вариантлар арасында хәттә Айваз да бар иде. Чая ханым югалып калмады, Айваз бит любовнигым түгел дип ярып салды! Соңрак билет табылды, ә тамашачы Рамазановлардан «бис»ка өченче җыр сорады.

 

Сәхнәнең утларыннан да яктырак күлмәк кигән Айгөл Рәхимова бу кичтә барыннан да бәхетле иде. Шуңа алып баручыларның төртмәле шаяруларына исе китмәде. Күптән түгел Филармониядә узган сольный концерты хаман күңелен җылыта иде.

 

Татарча солянка концертның хейдлайнеры – Хәмдүнә Тимергалиева. Легендар җырчыбызның хыялы тормышка ашкан булса, ул сәхнәгә очучы костюмыннан чыгар иде. Балачакта очучы булырга теләгән бит. Хәер, болай да яшьләрне бер якка куеп, сәхнә буенча ялт-йолт йөрде. Хәрәкәтләреннән болай сүзләре көчле: “70не генә тутырдым әле, “махы” биргән юк. Үлгәч тә, өч көн дошманнарга бирешми селкенеп торам”, - дип, җор теле белән халыкның күңелен күрде.

 

Шимбә кич булуы тәэсир иттеме, концерт тәмамланды, тамашачы гына таралашырга ашыкмады. Залдан салмак кына чыктылар, фойеда сөйләшүләр, фикер алышулар башланды. Һавада “ябыккан-тазарган”, “тагын барабыз” ише сүзләр эленеп калды..