Депутат Хафиз Миргалимов: “Колхозларны таркатасы түгел иде”

Дәүләт Советында КПРФ фракциясенә 4 ел эчендә халыктан 3 650 үтенеч хат кергән.

 

- Сайлаучылар юлларны һәм клубларны, мәктәпләрне һәм балалар бакчаларын төзекләндерүне сорый, аварияле торак мәсьәләсен күтәрә. Инвалидлар мәнфәгате тиешенчә якланмый,-диде Хафиз Миргалимов.- Республикада авыл юлларын, клубларны, мәктәпләрне төзекләндерү, фельдшер-аккушер пунктлары төзү буенча эшләр махсус программалар нигезендә алып барыла. Казандагы Ленин исемендәге мәдәният сарае, Ленино-Какушкино музей-йорты искерә башлаган иде. Без халыктан кергән үтенечләрне Татарстан Президенты Рөстәм Миңнехановка җиткердек. Нәтиҗәсен үзегез күреп торасыз-төзекләндерү үткәрелде.

 

Арча районының элеккеге җитәкчелеге 8 гаиләне өйләрен һәм йорт яны җир кишәрлекләрен калдырып, күп фатирлы йортка күченергә тәкъдим ясаган. Фатир -бушлай, дигән сүзгә ышанганнар. Торак фонды исә, һәр гаиләгә 2 миллион сум түләү кәгазе тоттырган. Шушы мәгълүмат Татарстан Президентына җиткерелгәннән соң гына чишелеш “бөек күченеш” ясаган гаиләләр файдасына үзгәргән.

 

- Россия Федерациясендә инвалидларны социаль яклау турындагы 181нче федераль закон тиешенчә үтәлми. Инвалидлар: Чистайдан Александр Шишкинны, Кукмарадан Дания Мизипованы һәм Питрәч районының Шәле авылындагы Илдус Мөхәмәтшинны торак шартларын яхшырту исемлегенә куймыйча тинтерәтәләр,-диде Хафиз Миргалимов. - Татарстанда күзләрдәге катарактага операция ясатырга 2018 елның октябренә 16911 кеше чиратка язылган, шулардан 2884 кеше генә кабул ителгән. Халык аптырагач, Чувашиягә һәм башка республикаларга барырга мәҗбүр. Бу мәсьәләне дә республика Президентына әйттек, ул офтольмология үзәген үстерүгә 66 миллион сум акча күчерергә күрсәтмә бирде.

 

Медицина темасы күтәрелгәч, әңгәмәгә Дәүләт Советы депутаты Артем Прокофьев та кушылды.

- Казанда гаиләләр авыру сабыйлары белән балалар хастаханәләренә килә. Табипта каралып чыгуларына машиналары юк: эвакуатор алып киткән. Моңа зарланучылар күп. Беренче чиратта хастаханәләр янында парковкалар булдырырга кирәк, машиналарны алып китеп, ансат кына акча эшлиләр,-диде Артем Прокофьев.

 

Финансовые услуги оказывает: АО «Тинькофф Банк», АО «Тинькофф Страхование».

Медицина һәм балалар турында сүзне янә Хафиз Миргалимов дәвам итте:

- Нинди бай илебездә авыру балаларны дәваларга халыктан акча җыялар. Оят мондый нәрсә. Газ тармагында 30 миллиард сумнар белән генә урлыйлар, әнә. Хисап палатасы ачыкласын шундыйларны.

Форсаттан файдаланып, депутат Хафиз Миргалимовтан колхозларга һәм фермерларга карата нинди фикердә булуы белән кызыксындым.

 

- Колхозларны һәм совхозларны таркатырга кирәкми иде. Аларның һәркайсында 15-20 белгеч һәм йөзләгән колхозчылар-эшчеләр эшләде. Әтнәдә бернинди агрохолдинглар юк бит, барысы да элеккечә, авыллар гөрләтеп яши. Чирмешәндә районның элеккеге башлыгы бөтен җирләрне сатып алып бетергән. Россиядә 42 миллион гектар, республикада 65 мең гектар авыл хуҗалыгы җирләре эшкәртелмичә ята. Чит илләрдән 25 ел буена комбайннар сатып алдык. Аларга хәзер запас частьләр кирәк, ә доллар курсын карагыз. Татарстан Президенты, республиканың Авыл хуҗалыгы министрлыгы фермерларга булыша, ләкин, мәсьәләне федераль югарылыкта хәл итү зарур. Кызганыч, илебездә авыл хуҗалыгына игътибар түбән. Россия бюджетының 1 проценты авыл хуҗалыгына юнәлтелгән, кимендә 7-8 процент кирәк,-диде Хафиз Миргалимов.

 

- Россия Хөкүмәте авылларны үстерүгә 25 миллиард сум күчереләчәген хәбәр итте. Ил күләмендә караганда бу акча “юк” күрсәткечендә. Мәскәүдәге “Зарядье” паркы төзелешенә генә дә 25 миллиард сумнан күбрәк акча тотылды, - дип өстәде Артем Прокофьев.

 

Хафиз Миргалимов:”Министрлыклардан һәм ведомстволардан, хакимият органнарыннан Президент күрсәтмәләренең үтәлешен катгый таләп итәргә кирәк. Шул вакытта халыктан зарланып мөрәҗәгать итүләр дә кимер иде”,-дип йомгаклады журналистлар белән очрашудагы уй-фикерләрен.