Тарихчыдан журналист ясап буламы?

Дәүсовет Рәисе урынбасары Римма Ратникова корылтайга ка­дәр үк берлек рәислегеннән китә­чәге турында белдерде һәм әлеге урынга Илшат Әминовны тәкъдим итте. Корылтай барышында бу вазифага башка кандидатура тәкъ­дим ител­мәде. Римма Ратникова исә бер­лекнең эшчәнлеге турында тәф­силле чыгыш ясады. Корылтай Татарстан берлегенең 100 еллыгына туры килгәнлектән, ул аның тарихына да тукталды һәм редакция хез­мәткәрләреннән тарихи ядкәр­ләргә карата сак булуны сорады.

 

Элекке рәис журналистла­р­ның эш шартларына, социаль яктан якланмавына да тукталды. Уз­ган корылтайда сәламәтлек мәсь­әләсе күтәрелгән булган, нәти­җәдә “Татмедиа” әгъзалары өчен диспансеризация оештырылган. Бары тик ике басма – “Ватаным Татарстан”, “Республика Татарстан” газеталары хезмәткәрләре генә медицина тикшеренүеннән читтә калган. Докладчы шушы юлларны укыганда, Фәрит Мөхәммәтшинның гаҗәпләнүе йөзенә чыкты. Алга таба Ратникова Дәүсовет Рәисенә хезмәт хакларының бик түбән булуын җиткерде. Район журналист­ларының хезмәт хакы 13-15 мең сум, холдинг буенча уртача хезмәт хакы 20 мең тирәсе булуын искә алып, бу мәсьәләне хәл итәргә кирәклеге турында искәртте һәм эш урыныннан кыскарту проблемасын да ассызыклады.

 

“Сер түгел, Журналистлар берлеге әгъзаларының күпчелеге олы яшьтә. Кайбер районнарда бер-ике кеше генә берлек әгъзасы. Димәк, безгә профессиональ журналистларны җәлеп итәргә кирәк. Яуда бер генә сугышчы була алмый бит. Әйе, монда без дә эшләп бетер­мәгәнбездер. “Татмедиа” системасындагы күп журналистлар кыскартуга эләгүе дә тәэсир итми калмагандыр. Шул ук вакытта баш мөхәррирләр арасында да берлек әгъзасы булмаганнары бар. Ә ничек кабул итәргә өлгерәсең? Кайбер җирләрдә бер елда мөхәррир 2-3 тапкыр алмашына”, – диде ул.

 

Илшат Әминов исә чыгышын булачак кадрлар мәсьәләсеннән башлады:

 

–  Бүген мәгълүмат чаралары монополияне югалтты. Чөнки гаджеты һәм интернеты булган теләсә кем үзе мәгълүмат чарасына әйләнә ала. Ләкин бу профессиональлек юкка чыкты дигән сүз түгел әле. Шуңа күрә мин журналист белеме мәсьәләсен кабыргасы белән куям. Бу проблема турында озак һәм күп сөйләшәбез инде. Кызганыч, КФУ журналистика белеме юнәлешендә бер генә бюджет урыны калдырмады. Дө­рес, бу мәсьәләне ничектер җай­лар­га тырыштык. Бу җәһәттән “Татмедиа” агентлыгына да рәх­мәт, бер максатчан төркем җый­дык. Редакцияләр бу балалар өчен акча түли. Ләкин  бу дөрес әйбер түгел. Шуңа күрә федераль хаки­мияткә бюджет урыннары бүлеп бирү  үтенече белән мөрәҗәгать итәм. Журналист һөнәре үзгәрде. Ул хәзер мультимедияле, мультиплатформалы. Без барыбыз да коточкыч зур тизлектә үзгәрергә тиеш. Үзгәрмисең икән медиабазардан төшеп каласың. Бүген кичәге тарихчыдан журналист ясап булмый. Журналист яза, сурәткә төшерә, монтажлый һәм эшенең нәтиҗәсен төрле платформаларга тарата белергә тиеш.

 

Чыгыш ясаучылардан Сөмбел Таишева да залны җанландырды. Ул, “Татмедиа” җыелышларының күбесенә исеме өчен генә йөрергә мәҗбүр булганлыктан, журналист­ның аналитик язмалар әзерләргә вакыты калмый, диде. Шулай ук сәламәтлек, шифаханәдә дәвалану мәсьәләләрен дә күтәрде. Римзил Вәлиев Татарстан матбугатының хәленә тукталды. Журналист яшь­ләр өчен бер генә матбугат чарасы да булмавын әйтте. “Молодежь Татарстана” ябылды, ә “Татарстан яшь­ләре” авыр хәлдә, диде ул.

 

Дәүләт Советы Рәисе Фәрит Мөхәммәтшин исә йомгаклап журналистларны әзерләү өчен бюджет урыннарын кайтару кирәклеген әйтте. “Журналистлар әзерләү өчен бюджет урыннары булмау безне бизәми. Татарстан Хөкүмәте һәм ректор белән дә сөйләшәчәкбез, яңа мөмкинлекләр табылыр дип уйлыйм. Үзебезгә үзебез аяк чалабыз. Үзебез, ике, өч телле журналистлар кирәк, дибез, үзебез шуны эшләмибез, – диде ул һәм һөнәргә хөрмәт мәсьәләсен дә кузгатты. – Исемеңне куймагач, дәрәҗәңне төшерәсең бит. Мин легаль эшләү яклы. Исем куймау – һөнәргә карата ихтирамсызлык. Исемсез язмалар белән җәмгыятьтә коткы таратучылар да бар”.

 

XIX корылтайның төп мәсьә­ләләре әнә шулар булды. Татарстан Журналистлар берлегенә рәис итеп Илшат Әминов сайланды. Римма Ратникова бу вазифаны 24 ел башкарды. Барлыгы берлектә 1100 әгъза теркәлгән. Шуларның 130дан артыгы корылтайда катнашты.

Фото: Татар-информ