Рәсүлебезгә салават

Эш көне булуына карамастан, залда алма төшәрлек урын юк иде. Чара алдыннан фойеда да халык күп йөрде. Кемдер Самараның “Ак калфак” оешмасы хатын-кызларының кул эшләренә карап сокланды, кемдер рәссам Тәслимә Мостафинаның картиналарын күзәтте, кемдер “Бердәмлек”кә язылырга ашыкты (ел ахыры бит, кадерле укучыларыбыз 2019 елның беренче яртысына язылырга онытмаганнардыр, дип ышынабыз), кемдер “Түбәтәй” тиз ашау кафесыннан китерелгән татар милли ашлары белән сыйланды, ә кемдер "Ак калфак" оешмасы җитәкчесе Разия Әюпованың аш-суларыннан авыз итте.

 

Ә күргәзмәләр артында шашка өстәлләре тезелеп киткән. Бу яңалык турында үзе дә, шашка буенча дөнья чемпионы булып танылган Фәхретдин Канюкаевтан сораган идем, шаярыбрак җавап бирде бугай:

 

- Муллалар яшьләргә якынрак булсын дигән идек. Менә, таныш булыгыз, Халыкара гроссмейстер Олег Дашков, Россия чемпионаты призеры Анастасия Дикушина яшьләребезгә мастер-класс күрсәтәчәкләр. Бәлки, шушы көннән башлап, шашка спорты татарлар арасында тагын да популяр булып китәр әле.

 

Уен башлану белән малайлар шашка өстәлләрен сырып алдылар һәм, залга тамаша карарга да кермичә, кич буе уйнадылар.

 

Төрле авыллардан, шәһәрләрдән, Самараның үзеннән килгән халык утырышып беткәч, сәхнәдә зур экран кабынды һәм фильм башланды. Карале, артистлары Самараныкылар икән бит! Үзебезнең татар кызлары һәм егетләре чын профессиональ дәрәҗәдә төшергән кыска гына фильм беркемне дә битараф калдырмады. Төп герое - яшь кенә татар егете (рольдә “Яктылык” мәктәбен тәмамлап, югары уку йортында укучы Илнур Биккулов) төне буе кызлар белән типтерде, дуслары белән сыра эчте, өенә кайткач, төшкә кадәр йоклады. Аны уятырга кергән әнисе (“Яктылык” мәктәбе директоры сәркатибе Лилия Вакказова) улын битәрли башлаган иде, егет аңа катырак сүз әйтеп, чыгып йөгерде һәм, дусларының эшләре буенча машинага утырып китеп, юл һәлакәтенә эләкте. Аңсыз яткан егетне шайтаннар алып китәргә дип килгәннәр иде, ләкин әнисенең догалары саклап калды һәм Аллаһы Тәгалә, хаталарын тану һәм төзәтү өчен, кабат аны җиргә кайтарды...

 

Фильмның тормыштагы өлеше - экранда, ә Мәхшәр мәйданындагы хәлләр сәхнәдә барды. "Яктылык" мәктәбе укытучысы, яшь режиссер Вәсимә Фәрдиеваның бу идеясе бигрәк тә уңышлы барып чыккан. Күпчелек ханымнар, кешегә күрсәтмичә генә, күзләренә килгән яшь бөртекләрен сөртеп утырдылар. Дөрестән дә, безнең арабызда да бу егет кебек аңы җитлекмәгән үсмерләр юк түгел бит?! Алар акылга утырганчы әле күп еллар үтәргә, күп хаталар ясалырга мөмкин. Ә шушы кыска гына фильм ярдәмендә яшьләрне Аллаһыга якынайтырга, намазга бастырырга, мөселманча яшәү рәвешенә өйрәтергә була.

 

Олы яшьтәге бер әби: “Нәрсә дип моны күрсәтәләр инде, муллалар сәхнәгә чыксын иде”, - дип боргалана башлаган иде, шул рәттә утырган имамнарның берсе: “Тынычлан әби, гыйбрәт өчен бу”, - дип аны шундук тынычландырды. Чыннан да, гыйбрәт булды инде.

 

Әлбәттә, сәхнәгә мулла да чыкты. Дөресләп әйткәндә, Мәүлид ән-Нәби бәйрәмен оештыручылар - региональ Диния нәзарәте рәисе, мөфти Талип хәзрәт Яруллин һәм Бөтендөнья татар конгрессы бюросы әгъзасы, өлкә “Дуслык” татар иҗади-иҗтимагый оешмасы президенты Фәхретдин Канюкаев халыкны бишенче тапкыр уздырылучы Мәүлид ән-Нәби бәйрәме белән котлап, иң изге теләкләрен җиткерделәр. Шулай ук губернатор администрациясенең милли һәм конфессиональ сәясәт идарәсе җитәкчесе Надежда Осипова губернаторның һәм үзенең котлау сүзләрен җиткерде. Надежда Петровна Дмитрий Игоревичның йөкләмәсен үтәп, Камышлы мөх-тәсибәтенең имам-мөхтәсибе Рамил Кәримовка, Яңа Усман авылы имам-хатыйбы Ринат Кәлимуллинга, “Дуслык” татар иҗади-иҗтимагый оешмасы президенты киңәшчесе Идеал Галәүтдиновка һәм башкаларга губернаторның Рәхмәт хатларын тапшырды. Ә “Туган тел” татар җәмгыяте президенты Ильяс Шәкүров татар халкы үсешенә керткән зур өлеше өчен Бөтендөнья татар конгрессының иң югары бүләгенә - медальгә ия булды. Шулай ук “Прогресс-В” компанияләр төркеме президенты Вазыйх Мөхәммәтшин Татарстан Республикасы Дәүләт Советының Рәхмәт хаты белән бүләкләнде.

 

Искиткеч матур бу бәйрәм “Яктылык” татар мәктәбе укучылары башкаруындагы җырлы-биюле номерлар белән үрелеп барды. Чара Татарстан Республикасының халык артисты, җырчы, мөгаллим Миңгол Галиев һәм аның укучысы Ильяс Халиковның Мөхәммәт пәйгамбәргә багышланган җырлары һәм мөнәҗәтләре белән тәмамланды.