|
|
Бүген кемнәр туган
|
|
Архив
|
08.04.2010 Җәмгыять
ТЕЛЕФОННАН СӨЙЛӘШҮ
– Туфан абыймы?
– Әйе.
– Исәнмесез. Бу Сезнең спектакльләрне карап Сезгә гашыйк булган студент кыз.
– Рәхмәт.
– Рәхмәт кенә аз, Туфан абый, Сезнең белән очрашасым килә.
– Ни өчен?
– Гашыйк булганнарга андый сорауны бирмиләр, Туфан абый.
– Сезгә ничә яшь?
– Миңа 20, Сезгә 72. Гете белән Матильданың яшь аермасыннан азрак.
– Очрашкач нишләрбез икән соң?
– Гашыйклар нишли без дә шуны эшләрбез.
– Гашыйклар дип әйтер өчен миңа да гашыйк булырга кирәк бит әле.
– Күргәч мине ошатачаксыз. Мин Нәҗибә ападан чибәррәк.
– Шулай ук мыни?
– Шулай ук.
– Болай булгач уйлап карарга кирәк.
– Уйлап карагач, булмый инде ул, Туфан абый. Мәхәббәтнең ачы дошманы – уйлау.
– Исемегез ничек соң?
– Аның нигә кирәге бар. Гайниҗамал булды ни, Мәхүпҗамал булды ни... Кайда очрашабыз, Туфан абый.
– Хәзерге кызлар белән ресторандадыр инде.
– Анда кеше күп.
– Сезгә аулак урын кирәкмени?
– Мәхәббәт шаһитлар булуын өнәми. Кая чакырсагыз, шунда барам. Кайчан икәнен әйтегез дә...
– Кызык булып китте, бит әле бу.
– Нигә, Туфан абый?
– Очрашуны күз алдына китерәм. Телефоннан сөйләшкәндә дә башларым әйләнеп китте.
– Хатын-кызны Ходай, ирләр башын әйләндерер өчен яраткан. Дөньяда бөтен нәрсә әйләнә бит. Хәтта җир шары үзе дә.
– Күпне беләсез.
– Сез бит томана кызларны яратмадым, дип язасыз.
– Гел энциклопедия уку да кызыксыз.
– Ха-ха-ха. Мин аңгыра булып та кылана беләм. Сез сүзне әллә кая бормагыз, кайда һәм кайчан очрашабыз?
– Минем телефон номерын Сезгә кем бирде?
– Нәҗибә ападан сорап алдым. Башта шикләнде, мәктәптән, очрашуга чакырабыз дигәч, бирде.
– Алай икән.
– Алай икән дип шикчән кешеләр генә әйтә. Сез миннән шикләнәсезме?
– Әгәр дә мин егерме-егерме биш яшьтә булсам, шикләнмәс идем. Бүгенге кызлар егетләрне үзләре аулый.
– Сез үзегезне егет дип санагыз.
– Әй, сеңелкәем, санап кына булса иде ул. Сау булыгыз.
– Нәрсә, минем тәкъдимнән баш тартасызмы, Туфан абый?
– Шаярдык, җитте.
– Сез мине шаярта дип уйлыйсызмы?
– Уйлыйм шул, бәгырькәем, җанкисәккәем.
– Рәхмәт, Туфан абый. Сезнең спектакльдә телефоннан сөйләшеп гашыйк булышалар. Без бәхәсләшкән идек. Кызлар әйтә, язучылар үзләре белән булганны язалар ди. Мин әйтәм, уйлап чыгаралар дим. Сау булыгыз.
Телефонымда язылып калган номерга шалтыраткан идем, чыркылдап көлгән кызлар тавышы гына ишетелде.
Туфан МИҢНУЛЛИН |
Иң күп укылган
|