02.11.2018 Җәмгыять

Татарча диктант яздык

2016 елдан башлап Бөтендөнья татар конгрессы “Татарча диктант” акциясе оештыра. Быел ул 27 октябрьгə билгелəнгəн иде һəм 20дəн артык чит илдə, Россиянең 45 регионында, Казанның үзендə һəм Татарстан Республикасының һəр районында узды.

Безнең төбəктə төп оештыручылар булып өлкə татар автономиясе, “Туган як” газетасы һəм “Ак калфак” татар хатын-кызлары оешмалары чыкты. Сергач, Спас, Кызыл Октябрь, Пильна районнарының мəгариф бүлеклəре дə зур ярдəм күрсəтте. Диктантны Кызыл Октябрь районының Уразавыл, Зур һəм Кече Рбишча, Чүмбəли, Семочки, Яндавишча, Спас районының Татар Моклокасы, Пильна районының Сафаҗай мəктəплəрендə, Сечен районы Красный Остров авылы китапханəсендə һəм Сергач шəһəренең Балалар иҗаты үзəгендə 150гə якын кеше язды, шул арада безнең редакция хезмəткəрлəре дə татар теле буенча белемнəрен тикшерде.

Диктант язучылар арасында мəктəп укучыларыннан башлап, олы яшьтəге абый-апаларга хəтле бар иде. Тагын шунысы шатландыра – күбесе яхшы билгелəргə язган, икелелəр бөтенлəй юк. Без барлык нəтиҗəлəрне Казанга җибəрдек. Ноябрь ахыры – декабрь башында һəр катнашучыга сертификат булыр дип ышандырдылар оештыручылар. Бу акциядə катнашучы һəркемгə зур рəхмəт, диктантны яздырган һəм эшлəрне тикшергəн татар теле укытучыларына олы рəхмəтлəребезне белдерəбез, аларның һəрбересе өлкə татар автономиясе тарафыннан “Туган як”ка ярты еллык подписка белəн бүлəклəнер.

Килəчəктə “Татарча диктант” акциясендə тагы да зуррак активлык күрсəтербез дип ышанып калабыз.

---
Туган як
№ --- | 02.11.2018