12.10.2018 Мәдәният

Минтимер Шәймиев Рифат Фәттаховка рәхмәт белдерде

Шушы көннәрдә Татар дәүләт филармониясендә Рәшит Ваһапов исемендәге Халыкара татар җыры фестиваленең гала-концерты үтте. Оештыручылар исеменә Татарстан Республикасының Беренче Президенты Минтимер Шәймиев исеменнән дә котлау хаты килде. Анда мондый юллар бар:

“Газиз милләттәшләр!

Сезне сөекле җырчыбыз Рәшит Ваһаповның тууына 110 ел тулуга багышланган җыр бәйрәме белән ихлас күңелдән котлыйм! Бу истәлекле датаның бүгенгедәй зурлап үткәрелүе халкыбызның Рәшит Ваһаповка һәм аның кабатланмас иҗатына олы ихтирамы һәм игътибары турында сөйли. Бөек җырчыбызның мәгърур тавышы, халкыбыз күңеленә тиң моңы, мәңгелек җырлары – милләтебезнең кадерле милли хәзинәсе ул.

Хәзерге вакытта Татарстанның халык артисты Рәшит Ваһапов истәлеген мәңгеләштерү һәм иҗади мирасын саклау вазыйфасын нигездә аның исемендәге Халыкара татар җыры фестивале һәм татар мәдәнияте фонды лаеклы башкарып килә. Дистәдән артык ел дәвамында Рәшит Ваһапов җырлары белән сугарылган, ел саен гомергә истә калырлык матур һәм мәгънәле фестиваль үткәрүчеләргә, аеруча фондны оештырган Рифат Фәттаховка олы рәхмәтебезне белдерәбез. Фестивальне халык җылы кабул итә, ярата, дөньяның татарлар яшәгән һәр җирендә фестиваль концертларының шыгрым тулы залларда узуы шуны дәлилләп тора.

Фестиваль җыр сөюче талантлы яшьләребезне табып, аларны олы сәхнәгә чыгарып кына калмый, җырларыбызны Рәшит Ваһаповча – чын халыкчан башкару үрнәген күрсәтеп килә дияр идем. Телебезне – моңыбызны, милли тәңгәллегебезне күз карасыдай саклау таләбе куелган хәзерге заманда моның әһәмияте артканнан арта бара.

Рәшит Ваһапов исемендәге яраткан фестивалебезгә - яңа иҗади казанышлар, безнең барчабызга да исәнлек-саулык, җырлы-моңлы озын гомер телим.

МИНТИМЕР ШӘЙМИЕВ,

Татарстан Республикасының

Беренче Президенты.”

---
Рәшит Ваһапов фестивале
№ --- | 12.10.2018