|
|
Бүген кемнәр туган
|
|
Архив
|
28.03.2010 Җәмгыять
АНА ЯЗМЫШЫШигырьләр.
Ана язмышы
Картлар йорты, тәрәзләре моңсу. Сагыш бөркә алар дөньяга. Йорт алдында кулын тезгә куеп, Утыра бер карчык, бичара.
Ак яулыклы ап-ак чәчле әби, Иман бөркә аның йөзләре. Яшьлек яры мәңгелеккә күчкәч, Ялгыз үтә гомер көзләре.
Ялгызлыклар кыен, әби чыдый, Бер Ходайдан сорый түземлек. Соңгы юлга инде бар да әзер, Сандыгында тулы үлемтек.
Хәер-сәдакәләр сандык төптә, Тәртип белән бар да салынган. Әмма әйтер сүзләр әйтелмәгәч, Йөзләренә сагыш сарылган.
Бәхиллекләр бирер өчен янда Балалар юк, шунсы аяныч. Ә бит ана өмет белән яши, Булыр, диеп, балам – таяныч.
Ләкин алар юклар, ана- ялгыз, Олы юлда яшьле күзләре. Калтырый да кипкән иреннәре, Пышылдыйлар дога сүзләрен...
Ана күңеле һәрчак баласында. Бала күңеле – чиксез далада. Карчык, бахыр, сезне кичерер дә, Гафу итәрме соң, и Алла?!
Уйлану
Көтү авыр, Йөрәкләрдә давыл Күңел тула, юктыр чаралар. Бала үскән, Еракларга күчкән, Ана йөрәгендә яралар.
Көтә үзе, Тәрәзләрдә күзе Бала киткән якка төбәлгән. Ник ул кайтмый, Әллә күңеле тартмый. Гомер юлларымы чуалган?!
Ялгыз башы Күз яшьләре аша Кабатлый ул бары бер дога: "Телим шатлык, Күңеленә – сафлык, Бәхет кошы кунсын кулына". Ялгыз ана Күз яшьләре тама, Олы юлга бага тәрәздән. Яшьлек бик тиз үтә, Гомер җебен сүтә, Ә картлыкта Ходай ни язган? Бөек исем – Ана Онытма син – бала! Салма аны кара кайгыга. Җылы сүзеңне әйт, Күрсәт кадер – хөрмәт, Тиңдер аңа Кояш, Ай гына.
Картлар йорты
Картлар йорты, моңсу бигрәк бу ике сүз. Тәрәзләрдән юлга бага ничәмә күз…
Бу күзләрдә яшь пәрдәсе, бетмәс сагыш, Аңлау кыен… язмышмы бу… әллә ялгыш…
Йортта җылы, тәрбияле, бар да җитә, Әмма картлар өмет белән нидер көтә.
Үткәннәрне сагынып үтә гомерләре, Уйлангачтын, өзеләдер бәгырьләре…
Кайсы уйлый үз баласын, йөрәк маен, Күзләреннән яшьләр тама минут саен…
Туган нигез төшкә керә, чыкмый уйдан, Үз йортында яшәүдән соң кемнәр туйган?
Кечерәйгән инде гәүдә, ап-ак чәчләр, Җыерчыклы бите буйлап ага яшьләр…
Гомерләр дә көзне узып кышка бара, Ялгыз кыен үтелә бу ике ара…
Язмышмы бу, ялгышмы бу – кемнәр аңлар, «Балам килер», – дигән юлга ява карлар…
Карлар салкын, сезгә карый яшьле күзләр… Картлар йорты… Бигрәк моңсу шушы сүзләр…
Башкортстан, Тәтешле районы.
Мөхәммәт НУРИ |
Иң күп укылган
|