"Татар радиосы" чираттагы туган көнен ачык һавада "Зур концерт" белән уздырды (ФОТО)

 

“Зур Концерт”та күп кенә танылган татар эстрадасы артистлары катнаштылар. Традицион рәвештә концертны “Татар радиосы” диджейлары, танылган алып баручылар дуэты Айваз Садыров һәм Гөлназ Сәфәрова ачып җибәрделәр. Һәрвакыттагыча бу дуэт тамашаның “сулышы” ролен башкарды. Бер-берсеннән матур җырларны сулышын кысып тыңлаган тамашачылар, алып баручылар чыгуы белән, шаяруларына бирелеп, көндәлек тормыш проблемаларыннан ерак киттеләр.

 

Концерт “йолдызлыгы”нда Иркә, Салават Миңнеханов һәм Гүзәлем, Алсу һәм Азат Фазлыевлар, Ришат Фазлыйәхмәтов һәм Хәмдүнә Тимергалиева кебек танылган җырчылар чыгыш ясадылар. Һәр артист үзенең иң популяр, халык яратып тыңлаган җырларын бүләк итте. Концерт карарга килгән кунаклар да, җырчыларны җылы каршы алып, чыгышлар дәвамында аларга кушылып, кабатланмас татар җыр-бию атмосферасына бирелделәр.

 

Җырчылар чыгышларыннан кала, казанлылар, әлбәттә, "Татар радиосы"ның махсус әзерләнгән уен-ярышларда катнашты. Интерактив уеннарда катнашу нәтиҗәсендә, тамашачыга партнерлар һәм спонсорлар тарафыннан шәп бүләкләр тапшырылды: “Кукмара” метал савыт-саба заводыннан кәстрүлләр, «BBQ» (БиБиКью) бургердан комбонаборга сертификатлар, “Летай” мобиль операторыннан сертификатлар, “Глобус” кибетләр челтәреннән сертификат һәм сувенирлар, “Росбанк”тан брендланган термокружка, “Сады” хәләл кафесыннан сертификатлар. Иң кыйммәтле һәм оригиналь призларның берсе - "Бәкер" шифаһанәсе ярдәме белән уйнатылды. Уен махсус лотерея форматында узды. Нәтиҗәдә җиңүчегә “Бәкер” шифаһанәсенә юллама тапшырылды.

 

23 август Горки-Әмәт урман-паркы кунаклары өчен бу җәйнең иң күңелле кичләренең берсе булып истә калды. Парк кунаклары сүзләре буенча мондый тамаша булуы шәһәр өчен бик мөһим. “Татар радиосы”ның “Зур концерт”ы Казанда инде икенче тапкыр уза, һәм шәһәрнең традицион бәйрәменә әверелә бара. Тамашачылар концерт дәвамында туган җылы энергетиканы әле озакка суздырырга тырышачаклар дигән фикер белдерделәр һәм “Татар радиосы”на үз рәхмәтләрен белдерделәр. “Татар радиосы” алда да казанлыларны сөендерергә тырышачак дип вәгъдә итте. Мондый ике яклы аралашу нәтиҗәсендә киләчәктә Казанны тагын да зур һәм сыйфатлы тамашалар көтәчәк дип ышанабыз.