ФАТИР – ВЕТЕРАНГА, Ә КАЛГАННАРГА – КӨТӘРГӘ...

Ветераннарның торак шартларын яхшыртуга кагылышлы законга үзгәрешләр кертелгәннән соң, күпләр үзләренең фатирга мохтаҗ икәнлекләренә яңа төшенә башладылар диярсең?! Хәер, күп очракта ветераннар түгел, балалары, оныклары «уянып» киткәндәй булды. Сугышта катнашканнарны торак белән тәэмин итү ТР Президенты каршындагы Дәүләт торак фондына йөкләнде. Тик менә аның кадәр фатирны каян алырга? Бер түрәбез: «Казанда 100 фатир табып булмыймыни? Чират торучылар бер-ике ай көтеп торыр, иң мөһиме – ветераннарны кайгыртыгыз», – дигән фикерне белдергән. Чарасызлыктан, узган ел бюджет өлкәсендәгеләргә, предприятиедә эшләүчеләргә уйнатылган фатирларны ветераннарга бирә башладылар. Бу күпләрне гаҗәпкә калдырды. «Ни өчен бу шулай, без кайда яшәргә тиеш, исәп счетына күпме акча күчердек ләбаса», – дип борчыла халык. Әлеге мәсьәләгә ачыклык кертү өчен, ТР Президенты каршындагы Дәүләт торак фонды башкаручы директорының җәмәгатьчелек белән эшләүче киңәшчесе Мидхәт Шәрифуллинга мөрәҗәгать иттек.

– Мидхәт әфәнде, интернетта тапшырылган беркетмәләр гамәлдән чыга дип искәртелгән. Ни өчен соңгы конкурста откан кешеләрнең фатирларын кире алалар соң?

– Беренчедән, конкурста фатир отканнан соң, кулга бирелгән вакытлыча беркетмә син бу торакның хуҗасы дигәнне аңлатмый. Чын беркетмәне алгач, ачкыч тапшырылгач, фатирыңны тартып алсалар, канәгатьсезлек белдерү урынлы. 2005 елның 1 мартына кадәр чиратка баскан ветераннарны Җиңүнең 65 еллыгы уңаеннан торак белән тәэмин итү – безнең төп максат. Без аларга тиздән әзер булачак фатирларны сайларга тәкъдим иттек.

– Соңгы зур конкурста ветераннар өчен дә фатирлар уйнатылды бит инде. Бу категория кешеләр өчен күпме кв метр мәйдан кирәклеге алдан билгеле түгел идемени?

– Күбесе документларны вакытында китермәде, кемгәдер фатир, урыны ошамый, сайландылар. Кайберәүләр шәһәр хакимияте аша алды. Шуңа алдан төгәл генә берни билгели алмадык.

– Ә тиздән яңа фатирга күченәм дип өметләнеп йөргәннәргә нишләргә?

– Киләсе конкурста торак сайлый алачаклар. Ул вакытта аларга фатир оту җиңелрәк булыр.

– Фатирсыз калганыңны каян белеп була?

– Ветераннар хәзерге вакытта фатир сайлый, аларга теләгән кадәр бүлмәлене алу хокукы бирелгән. Бу процесс соңгы сугыш ветераны фатирлы булганчы дәвам итәчәк. Ахырдан интернетта нәтиҗәләр басылачак. Сайттагы шәхси битегездә  конкурста откан фатирыгыз сугыш ветеранына тапшырылды дигән мәгълүмат чыкса, фатирсыз калган буласыз.

– Ничә ветеран фатирсыз соң әле?

– 12 кеше калып бара. Сугышта катнашучылар Ватанны яклап гомерләрен куркыныч астына куйганнар, кан түккәннәр, зур Җиңү китергәннәр. Алар белән бары горурланырга гына була.