Бәйрәм узса да, сөйләр сүзләр бар әле (ВИДЕОАНОНС)

Биредә Россия данын яклап, илебезнең төрле өлкәләреннән килгән көрәшчеләр көч сынашты. Алай гына да түгел, әлеге җиде үлчәү авырлыгында бил алышкан баһадирның барысы да “Дөнья чемпионы” исеменә лаек булдылар. Әлбәттә, мондый дәрәҗәле исемне алу өчен никадәр тир түгәргә, спортны яратырга, үҗәт булырга кирәк.

 

Егор Егоян, Азат Нурмөхәммәтов, Альберт Рәхмәтуллин, Ренас Кәлимуллин, Ильмир Төхвәтуллин, Айнур Сыртаев, Муса Галләмов исемнәре күпләребезгә яхшы таныш. Нәкъ менә алар мәртәбәле ярышларда катнашып җиңүләр яулап, “Россия чемпионы”, “спорт остасы” кебек исемнәргә лаек булалар. Куелган максатларга ирешү өчен алар җәрәхәт алудан да курыкмыйлар. Мәсәлән, Төмән өлкәсеннән килгән, Россия данын яклаган – Егор Егоян дөнья чемпионатына кала берничә көн алдан имгәнә. Шулай да ул, авыртуга түзеп, теше-тырнагы белән беренчелекне бирми. Ханты-Мансийсктан килгән Альберт Рәхмәтуллинның да кискен көрәше күпләрне таң калдырды. Ник дигәндә, көндәше Игорь Бешляга белән көрәшкән вакытта алган яралары өчен хәтта берничә тапкыр көрәшне туктатырга туры килде аңа. Билгеле, һәркемнең җиңәсе килә. Ләкин, күрәсең, Альберт Рәхмәтуллинның омтылышы зуррак булгандыр. 

 

Әйе, көндәшләр барысы да нык, күбесе спорт остасы исемен йөртүчеләр. Шулай да, андый көндәшләр булуга, безнең спортчылар каршы түгел.

– Шулкадәр спортчы безнең көрәшкә тартылып, кереп китсә – мин каршы түгел. Көндәшләр арта дип тә курыкмыйм. Киресенчә, аларның күп булуы яхшы, көрәшне башка җирләрдә дә танытып булыр иде, шулай ук ярышларны Татарстанда гына түгел, башка өлкәләрдә дә оештыру мөмкинлеге ачылыр иде, - дип белдерде дөнья чемпионы – Муса Галләмов. 

 

Дөнья чемпионатына көрәшчеләр генә түгел, халыкара класслы хөкемдарлар да әзерләнде. Алар өчен махсус семинар оештырылды. Сабантуй бәйрәмнәре гадәттә алар өчен келәмдә, көрәш мәйданында уза. Динар Зиннәтуллинның да нәкъ менә шулай.

 

– Саба районы Мингәр авылында булган көрәш буенча дөнья чемпионатына хөкемдар буларак чакырдылар. Әле моның белән  генә чикләнеп калмыйм, шулай ук үзебезнең Биектау районында үтәчәк Сабантуйда һәм башка берничә авылда хөкемдар булачакмын. Бәйрәмнең башка чараларына вакыт бик калмый: мин я хөкемдарлык итәм, я көрәшәм, я көрәшне гади тамашачы буларак карыйм, – дип сөйләде ул. 

 

Бәйрәм уза, ләкин аның шаукымы әле озакка бара. Көрәш буенча дөнья чемпионатында булган күп кенә вакыйгалар тамашачыга әле билгеле түгел. Нәкъ менә шулар хакында тиздән GONGTV спорт һәм музыка каналында чыгачак “Данлы мәйдан” тапшыруында сөйләшәчәкбез.  Студиянең кунагы –  чемпионатта Россия җыелма командасының баш тренеры, Фәрит Шәйхетдинов.Тапшыруның алып баручысы – Журналистлар берлеге әгъзасы, Айдар Шәймәрданов.