|
|
Бүген кемнәр туган
|
|
Архив
|
24.04.2018 Мәдәният
Бүген күренекле татар җырчысы Усман Әлмиевның туган көнеБүген күренекле опера һәм эстрада җырчысы, ТАССРның халык артисты (1957), «Фидакарь хезмәте өчен» медале иясе Усман Әлмиевның туган көне. Усман Әлмиев 1915 елның 24 апрелендә ТАССРның Зөя өязе Яшел Үзән районы Акъегет авылында туа.
Ул биш яшендә әти-әнисен югалтып, Зөя каласындагы ятимнәр йортында тәрбияләнә. Кечкенәдән үк бик тырыш була Усман, табигатьтән бирелгән үзенчәлекле тавышын үстерүгә куйган тырышлыгы егетне тамашачы мәхәббәтен казанган профессиональ җырчыга кадәр үстерә.
1932-1935 елларда Татар сәнгать техникумында,1935-1938 елларда П. Чайковский исемендәге Мәскәү дәүләт консерваториясенең Татар опера студиясендә укый. Укуын тәмамлап кайтып, Татар дәүләт опера һәм балет театрында эшләгән егерме ел дәвердә (1938-1958) тарихка алтын юллар белән язылып калырлык онытылмас төп партияләрне башкара: Нәҗип Җиһановның «Алтынчәч» операсында Урмай һәм Җик Мәргән, Хөснул Вәлиуллинның «Самат» операсында Самат, Салих Сәйдәшевнең «Наемщик» музыкаль драмасында Имангол, Җәүдәт Фәйзинең «Башмагым» музыкаль комедиясендә Галимҗан, «Хуҗа Насретдин» музыкаль комедиясендә Хуҗа Насретдин, Дмитрий Кабалевскийның «Тарас гаиләсе» спектаклендә Андрей, Узеир Гадҗибәковның «Аршин мал алан» музыкаль комедиясендә Әскәр, һ.б.. Татар дәүләт опера һәм балет театрына нигез салыну һәм үсеш еллары да Усман Альмеев исеме белән бәйле.
Сугыш елларында Татарстан радиосы аша сугышчыларны җиңүгә рухландырган «Шауласыннар яшел урманнар», «Җиңеп кайт», «Очучылар җыры», «Сугышчы җыры», «Тормыш җыры» һәм башка патриотик җырларын башкаручы да Усман Әлмиев була.
1958-1968 елларда Усман Альмеев Габдулла Тукай исемендәге Татар дәүләт филармониясендә җырчы-солист була. Гаҗәеп көчле тавышы, ачык йөзе, сәхнәдә үз-үзен тотышы, бетмәс - төкәнмәс оптимизмы һәм тормышны яратуы белән тамашачыны таң калдырып иҗат итә ул...
Гомеренең соңгы елларында да сәхнә аксакалы яшьләргә хас иҗат дәрте белән янып, илһамланып яши. Озак еллар Татарстан театр әһелләре берлегенең ветераннар советы рәисе була.
2010 елның 18 маенда Г.Тукай исемендәге Татар дәүләт филармониясе сәхнәсендә Усман Әлмиевның 95 яшьлек юбилее зурлап уздырыла.
2011 елның 14 апрелендә зур җырчы бакыйлыкка күчә. Аны Казанның Яңа Бистә татар зыяратына җирлиләр.
2015 елның апрель аенда Г.Тукай исемендәге татар дәүләт филармониясенең «Илһамият» клубы сәхнә ветераннары катнашында апрель аенда туган һәм вафат булган өч зур шәхескә – Габдулла Тукайга, Усман Әлмиевкә һәм Айрат Арслановка багышлап ретро-концерт, Мәрҗәни мәчетендә аларның рухына атап Корьән ашы үткәрелде.
--- |
Иң күп укылган
|