«МӘЧЕ ТУЕ» (ФОТО)

Шатлыкларга, борчуларга бай кыш үтеп китте. Бүген әле февральнең соңгы көне исәпләнсә дә, урамда – яз! Термомертлар бер градус җылыны күрсәтә, өй кыекларыннан тамчы тама... Дөрес, мондый температура ничә көн дәвам итәчәген әлегә бер кеше дә тәгаен генә әйтә алмый. Соңгы елларда табигать сюрпризлар күрсәтергә күнекте. Кеше фаразлавына буйсынмый бит ул. Тик шулай да, тәрәзәләрне ачып, бүгенге һава шартларыннан, йорт түбәләреннән тып-тып тамган су тамчылары тавышыннан хозурланып утыруга ни җитә?! Рәхәт!..

Язның җылы кояш нурлары кыш буена калын юрганга төренеп яшәргә мәҗбүр булган бөтен дөньяны иркәли, бала-чаганы, март аенда аеруча активлашып киткән песиләрне урамга әйдәкли. Ә урамда...

Бүгенге халәтебез үтә дә сәер. “Кеше” дигән затларны күздә тотып әйтүем, әлбәттә. “Кеше – табигать хуҗасы!” Бигрәкләр дә матур, горур яңгырый инде. Тик... чынбарлыкка күз төшереп алыгыз. Үз ятагын, үз йортын җимерүче, пычратучы адәм хуҗа исемен йөртергә хаклымы?

Авыл җирлегендә ничектер, әйтә алмыйм, ә менә шәһәр халкы яз килүен саклык белән генә каршы ала. Һәркемгә билгеле: ни сәбәпледер, кар эри башлауга шәһәр урамнарында кинәт машина аварияләре ешая, урам себерүчеләр тоз сибеп эреткән пычрак җепшек карлы тротуарларга аяк басасы килми. Кар эрегән саен газоннарда, торак йортлар тирәсендәге түтәлләрдә көз көне, кар яуганчы ташлап калдырылган чүп-чар өемнәре пәйда була. Кыш көннәрендә гаять чиста кебек күренгән урамнар, гафу итегез, җирәнгеч чүплеккә әверелә. Чаллыда да шулай, Казанда да, башка шәһәр-поселокларда да.

Шәһәр язын зур түземсезлек белән мәчеләр генә көтеп аладыр. Март аенда аларның мәхәббәт уеннары, туйлары башлана. Ләкин кешеләрнең ваемсызлыгына, пычраклыгына хәтта алар да шакката бүген. Хәтта аларның да бу урамнардан атлап йөриселәре килми. Алар агач башында гына “сайрашалар”, бер-берсе белән мәхәббәт аңлашалар... Нәтиҗә ясагыз, кешеләр, “табигать хуҗалары”!..

Саврасов. "Коты прилетели" (Автор фотосы).