ГАЗЕТАЛАРНЫ ЧАГЫШТЫРЫП ШАККАТТЫМ

“БГ”ның быелгы беренче санында басылган “Гыйбрәтле язмалар – шәп реклама” (авторы Рәзинә Галиева) язмасын укыгач, аңа редакция җавабы итеп, “бер мәкаләне кабат-кабат газета саен бастыру очраклары булса, безгә хәбәр итүегез сорала”, – дигән үтенечен искә алып, шул турыда язарга булдым. Менә “БГ”ның берничә саны кулга килеп иреште, көтеп алып, укып чыктым, җанга рәхәт... Бер дус ханыма кунакка баргач: “Син, Вәсилә, укырга яратасың, миңа кияү бер кочак яңа чыккан төрле исемдәге газеталар калдырды, алып кит, өеңдә иркенләп укырсың”, – диде.

Таратып ташлап, укырга керештем. Алдымда 11 гыйнварда чыккан 7 татар газетасы. Башта берсен актарып, укырдайларын укып чыктым. Аннары икенчесенә күчтем. Темаларын сайлыйм әле, дип карасам, шул ук язмалар, шул ук сурәтләр. Беренче газетадагы кебек үк, һәр бите кабатлана. Әллә бер үк төрлеләр эләктеме икән, дип 7сенең дә исемнәренә карадым. Юк, алар төрле басма. Барысында да бер үк әйбер кабатлангач, укып торасы да булмады, кызыгы калмады. Шунда элеккеге азык-төлекләргә талон чорында чыгарылган бер мәзәк искә төште. Түрәләр талон җыеп, азык-төлек алып интекми бит инде. Бөгелмә аракы заводы директоры янына икенче бер түрә кунакка килә, хәл-әхвәл сорашкач, килгән “кунак” хуҗага мөрәҗәгать итә:

– Кара әле, яшьтәй, минем бу айда туган көн. Юбилей. Аракы кирәк иде бит”, – ди.

Тегесе:

– Рәхим ит, сайлап ал, – дип җавап бирә.

Кунак кайсын сайларга икән дип баш вата. Хуҗа исә барысының да бер казанда кайнавын, этикетка һәм исемнәре генә төрле булуын аңлата.

Шулай булгач, сайлап торасы да юк. Менә без дә шул инде, “чагыштыру”, “сайлап алу” чоры, дип сүз йөртеп вакыт әрәм итәбез.

Тагын үз сүземә кайтыйм әле. Алда әйтелгән 7 газетадагы бер үк язмаларның берсе дә “БГ”да күренмәде. Әгәр укучы моңа юлыкса, җаны бизәр иде. “БГ” – бердәнбер, ул үзе булып кала белә. Мин үземдә газетага карата горурлык хисе тойдым. Менә дигән тере, кабатланмас материаллары, җитди, зәвыклы булуы белән ул үзенең журналистларының һәм башка хезмәткәрләренең эш нәтиҗәсен күрсәтә.

Һәр кеше кабатланмас булган кебек, газета да, горурлыгын югалтмыйча, үз юлыннан барсын. Үзенчәлекнең асылы шундадыр, дип уйлыйм.