Егетнең якыннары аның исән калуына өметне өзгән була

– 2015 елның декабрен мәңге онытмам. 25е көнне мин коточкыч юл һәлакәтенә очрадым. Исән җи­рем калмаган иде. Ике тәүлек­тән артык аңсыз ятканмын, – дип искә ала ул. Егетнең якыннары да аның исән калуына өметне өзгән була. Тик яшь организм тырыша, үзе­некен итә, Рияз тернәкләнә башлый. Авариядә егетнең аякларына нык зыян килә. Шуңа да аңа башта Илизаров аппараты куялар. Ул чактагы авыртуларга ничек түзгәндер ул, анысын үзе генә белә! Табиблар аппаратны өч айдан алырга вәгъдә бирә. Рияз да шуңа ышана. Аппаратны алып ташларлар да үз аягыма басып йөреп китәрмен дип хыяллана ул. Тик хыялы чынга ашмый кала.

 

– Табиблар аягымның үлек­ләвен күреп алдылар. Аппаратны алу килешмәгән. Ай саен тишеп тордылар. Шулай итеп бер елга якын йөрдем. Шеш беткәч, Казан РКБ табибларына күрен­мәкче идем. Алар миңа булыша алмыйбыз, диделәр. Түләүле кли­никага юл тоттым. Күңел үзенекен итә бит. Янәсе, яхшы табибка күренәм дә тизрәк тереләм, култык таяксыз йөри башлыйм дип уйладым. Тик ялгышканмын икән. Биредә ясаган операция миңа файдага булмады, – дип сөйли Рияз.

 

Егетнең аяксыз калуы да мөм­кин. Хатыны Рәйсә дә әнә шуңа кайгыра. Арча хаста­ха­нәсендә шәф­кать туташы булып эшләгән бу кыз булачак ире белән интернетта таныша. Озак та аралашмыйлар, мәрхәмәтле кыз Риязга гашыйк була. Кайчандыр үзләрендә дәва­ланган егетне исенә тиз төшерә ул. Яшьләр кавышып, гаилә кора. Мо­ңарчы Рияз ялгыз гына күтәргән хәс­рәт­не алар хәзер икегә бүлә. Рәйсә дә иренең сәламәтләнүен тели.

 

– Аякка басу өчен, минем буыннарыма протез куярга ки­рәк. Әмма бу – кыйммәтле операция һәм аны чит илдә генә ясыйлар икән. Берничә клиникадан белешеп карадык. Аякка басар өчен 1,5 миллион сум акча кирәк. Миңа инвалидлык бирделәр, хатыным бәби көтә. Әтием дә иртә үлеп китте. Бер әнием генә фермада бил бөгә. Әмма аның акчасына өметләнеп булмый. Ә яшисе килә. Шуңа күрә, изге күңелле кешеләрдән ярдәм  сорыйм:  зин­һар, мине авыр хәлдә ташламасагыз иде, – ди ул. – Аягыма басып йөрисем, гаиләмә ки­рәкле буласым килә. Әгәр бу теләгем тормышка ашса, мин, ке­шеләр, сезгә мең рәхмәтле булыр идем.