ЯЛЕ, ТАНЫП КАРАГЫЗ! (“АКЧАРЛАК” ЖУРНАЛИСТЛАРЫНА ПАРОДИЯЛӘР)

“Матбугат.ру”да кунакта “Акчарлак” газетасы. Андагы журналистларының теле бүтәннәрнекенә охшамаган. Кайбер авторларны беренче җөмләдән үк танып була. Әгәр ышанмыйсыз икән, тикшереп карагыз. Сезнең алда өч мәкалә. Аның берсен Эльмира Флүн, берсен Искәндәр Сираҗи, берсен Габдерәхим язган. Кайсы язма кемнеке икәнен бик җиңел беләчәксез.

БЕРЕНЧЕ ЖУРНАЛИСТ

Беркөнне кесә телефоным шалтырый. Казанның Кавалский урамы, 69 йортта яшәүчеләр икән. “Тизрәк кил, соңгы өмет синдә!” – диләр. “Нәрсә булды, ник шыңшыйсыз?” – дим. “ЖКХ начальнигы Бәтиевкә түзәр хәл калмады, бездән җыелган акчаны туздырып ята. Инде капиталь ремонтка дигән акчага ишегалдына кар бабайлар ясап куйды”, – ди бер әби елак тавыш белән. Иң кыю журналистлар – Руслан Хөснетдинов вә Сиринә Сәләхиеваны ияртеп шундук юлга кузгалдым. 

Мин килеп җиткәндә 69 йортның ишегалды халык белән тулган, мине генә көтеп торалар иде. Баксаң, биредә РФ Торак Кодексының 777 маддәсе бозылган икән, ягъни, это самое, капиталь ремонтка дигән акчага кар бабайлар ясалган. Иптәш Бәтиев исә мине күрүгә өр-яңа “Москвич”ына кереп бикләнде. Ошбу фәкыйрегез дә аптырап калмады, җилкәсеннән сөйрәп халык алдына чыгарып бастырдым мөртәтне. “Син, иптәш журналист, кысылма инде, үзебез генә хәл итәрбез”, – дигән була. Кысылмыйммы соң! Халык акчасына “Москвич” алган әрәмтамакка җәзаның иң зурысы булырга тиеш! Бу эшне болай гына калдырмаячакмын әле! Кирәк икән, тагын биш-алты журналист ияртеп килермен – бөтен Татарстанга шәрран ярачакбыз! Кайтуга ук Президентка, Татарстан прокуроры Кафил Әмировка хат юлларга җыенам! Кыскасы, бу эшне шәхси контролемдә тотачакмын! Бәтиевне, һичшиксез, манчыячакмын! 

ИКЕНЧЕ ЖУРНАЛИСТ 

Мин һәрвакыт командировкага Актаныш районы Апач авылына барам. Фәкать Апачта гына “Акчарлак”  укучылары өчен  кызыклы, гыйбрәтле хәлләр булып тора. Әле кичә генә шул авылдан кайтып төштем һәм итегемдәге карны да какмыйча, язарга утырдым. Ә, юк, башта төне буе йоклый алмый ятканмын икән әле. Андагы гыйбрәтле хәлләрне уйлап.  

Журналист кем ул сезнеңчә? Минемчә ул – халык мәнфәгатьләрен яклаучы, аларны борчыган проблемаларны күтәрүче, халыкка ни кирәген тоеп, эчкерсез йөрәге аша үткәрә белүче. КДУның журналистика факультетында укыганда безгә шулай дип өйрәттеләр. 

Ә менә Апачта яшәүче Кыеккулов Ч. Ч. журналистика факультетында укымаган, укыган булса, колхоз идарәсе каршындагы бердәнбер чыршыны кисеп алып кайтмас иде. Искитмәле, котчыкмалы, шаккатмалы хәл! Моның турында ишеткәч, башым әйләнеп китте, йөрәгем авыртырга тотынды, гөрселдәп җиргә аудым. Ничек инде, үз авылыңның кадерле ядкарен харап итәргә була? Ничек инде йөрәгем авыртмасын, мин дә шул авылныкы бит… 

ӨЧЕНЧЕ ЖУРНАЛИСТ 

Мине Кар кызы итеп куйдылар. “Акчарлак”тагы Яңа ел кичәсендә. Бүлмәгә керүем булды, ап-актан киенгән куянкайның аягына китереп тә бастым. Аһ, бу куян булып чыкмады! Бу бит иң яшь, иң сылу журналист кызыбыз Алсу! Чибәр кыздан гафу үтенеп, аны кочаклап үптем дә, юлымны дәвам иттем. Менә кулым кемнеңдер гәүдәсенә орынып китте. Борылып карасам, каршымда яшь, талантлы шагыйрь Рифат Сәлах! 

– Рифат, син саф егетме? 

– Аңламадым... 

– Кызлар кулы тотып караганың бармы дим? 

– Әйтмим. Сиңа әйтсәң, әллә ниләр язып чыгасың. 

– Әйт инде... 

– Әйтмим дидем бит! Карале, нигә миңа бәйләнәсең, ә?  

– Синең турында: “Шигырьләрен ашаганда яза икән”, диләр. Дөресме? 

– Юк!  

– Каян чыккан сүз икән соң ул алайса? 

– Син уйлап чыгарган сүз. 

– Сине берьюлы өч кыз белән йөри дип сөйлиләр… 

– Дөрес түгел! 

– Нигә алай дип әйтәләр икән соң? 

– Беркем алай дип әйтми, просто синең кызык мәкалә язасың килә, шуңа теләсә нинди сораулар бирәсең. 

– Ә синең размерың…  Аяк киеме размерың…  

– Юк!!! Ә менә анысы турында язарга кирәкми. 

– Ничек алай була соң инде ул?.. 

Яңа ел кичәсе дүрт сәгать барды. Күңелле. Өйгә кайтырга вакыт. Кыш. Саф һава. Тукталышка чыгып барганда битләренә маска кигән ике адәмнең тавышы колагыма чалынды: “First remove costume Snow Maiden, then look.” Инглизчә белмәгәч, берни аңламадым…

"Акчарлак" газетасыннан.