11.10.2017 Җәмгыять

Шашкачылар ярышты

Агымдагы елның язында Россиянең атказанган физкультура хезмәткәре Зәки Велемеев инициативасы белән Кызыл Октябрь районында шашка-шахмат федерациясе оешты. Ә аның җитәкчесе итеп милли районның хисап комиссиясе рәисе Таһир Юсипов сайланды.

Үткән атна ахырында мәгариф, спорт һәм яшьләр эше буенча район комитетының спорт секторы шушы федерация белән берлектә өлкәннәр арасында шашкалар буенча район чемпионаты оештырды. Үзләренең бу спорт төрендә сәләтләрен күрсәтергә 16 шашкачы килгән иде.

- Иң беренчедән, миңа ышаныч белдереп, шашка һәм шахмат федерациясенә җитәкче итеп сайлавыгыз өчен сезгә рәхмәт әйтәсем килә.

Ышанычыгызны аклап, бу уеннарны районда киң җәелдерүгә бар көчемне куячакмын. Бүгенге ярышлар район күләмендә генә булса, киләсе елның язында күрше район командаларын чакырып, районара чемпионат оештыру планы бар. Күршедәге Сечен районында Рәшит Нәҗметдинов истәлегенә ел саен шахмат турнирлары үткәрелеп килсә, без үзебезнең шәхесебез, оста шашкачы Шәмил Мөхетдиновның якты истәлегенә шашка турнирын гамәлгә куярга уйлыйбыз, - диде Таһир Рәшитович.

Судьялыкны алып бару районның спорт секторы белгече Марат Ибраһимовка йөкләнде, ә секретарь вазифасын Шәмил Османов башкарды. Марат әфәнде шашкачыларны уен кагыйдәләре белән таныштырды һәм 7 турдан торган ярыш башланды. Вакытында район финанс идарәсен җитәкләгән, хәзер лаеклы ялда булган Зиннур ага Аляутдинов бигрәк мавыгып уйнады. - Мин бирегә даими рәвештә шашка уйнарга йөрим, бүгенге чемпионатта Уразавылдан, Яндавишчадан, Куйсуыннан һәм Рбишчадан вәкилләр булганга, Уразавылда яшәсәм дә, туып- үскән Пашат авылы данын якларга булдым.

Таһир әфәнде йөзендә федерациягә, грек-рим көрәше буенча спорт мастеры Хайдәр Әндәрҗанов җитәкчелегендәге балалар һәм яшүсмерләр спорт мәктәбе исеменә шушы ярышларны оештырганнары өчен рәхмәт белдерәсем килә. Бу уен бер яктан хәтерне яхшырту өчен файдалы булса, икенче яктан күптәнге таныш-белешләрне очратып аралашу мөмкинлеге бирә, - ди Зиннур Билялович.

Уенчылар берничә сәгать дәвамында тырышып ярыштылар, әмма бәхет районның авыл хуҗалыгы идарәсе начальнигы Рафек әфәнде Колясовка елмайды, ә Куйсуының оста шашкачылары Рафаэль Шәрәфетдинов белән Әнвәр Исхаков икенче белән өченче урыннарны бүлештеләр. Оештыручылар аларны медальләр, грамоталар һәм акчалата бүләкләделәр.

Ришат РАМАЗАНОВ. Автор фотолары.

---
Туган як
№ --- | 11.10.2017