Без – россиялеләр!

Фестивальне үткән елда  “Шәһәр округы” номина¬ция¬сендә Гран-при бүләгенә ия булган Чапаевск үзешчәннәре “Яшь Россия” программасы белән ачып җибәрде. Бу көнне Самара филармониясе сәхнәсендә Кызыл Яр һәм Шенталы рай¬оны артистлары да чыгыш ясадылар. Соңгыларының “Без - россиялеләр” программасына жюри әгъзалары һәм тамашачылар тарафыннан аеруча югары бәя бирелде. 

Чынлап та, шенталылылар бу көнне халыкны “кыздырдылар”. Җыр-бию, моң аша алар үз районнарында яшәүче төрле милләт халыкларының мәдәнияте, иҗаты байлыгын күрсәтә алдылар.  Рус, татар, мордва, чуваш һәм башка милләт вәкилләре үзләренең чыгышларында танылган якташлары хакында сөйләп, илебезнең спорт, фән һәм мәдәният, космонавтика һәм башка тармакларның үсешенә керткән өлешләре турында бәян иттеләр. 

 

Программаны Татьяна Маркелова “Красно солнышко” җырын акапелла башкаруы белән башлап җибәрде. Ан¬нан, якты колейдоскопны хәтер¬ләтеп, сәләтле артистлар сәхнәдә бер-берсен алыштырып кына торды: Регина Галимова җитәкчелегендәге “Вдохновение” бию ансамбленең “Зәңгәр күлләргә карыйм” дип аталган композициясеннән соң  “Мин Россия өстеннән очам” җыры яңгырый башлады. Ә бу вакытта сәхнәдә зур экраннан илебезнең кабатланмас матур табигать почмаклары сурәтләре күрсәтелеп торды. Иксез-чиксез урманнар, гажәеп тыюлыклар, тирән елгалар hәм күлләргә карап, тамашачылар Россиянең ни кадәр киң һәм матур  булуына сокланып утырдылар. 

 

Ә тамаша дәвам итте. Чытырлы авылыннан - “Хунав”, Баландаеводан “Асамат” чуваш ансамбльләре тамашачыларны милли җырлары белән сәламләсә, Багана авылы Мә¬дәният йортының - “Чилисема”, Иске Шенталыдан “Пейделька” җыелма ансамбльләре бергәләп “Яшел болында” дип аталган мордва халык җырын башкардылар. Аннан сәхнәдә татар көйләре яң¬гырап, уен-көлке, күңел ачулар башланып китте. Денис авылының “Чулпан” татар ансамбле  үзешчәннәре “Вдохновение” коллективы белән бергәләшеп тамашачыларга татар халкының иң күркәм бәй¬рәмнәренең берсе - Сабан туе күренешен тәкъдим иттеләр. 

 

Шенталы районының чыгышы солистка Ирина Храмова һәм район үзешчәннәре хоры (барлыгы 108 кеше) башкаруындагы “Дай Бог мира и счастья России” җыры белән тәмамланды. Ватаныбызга, туган җиребезгә һәм анда яшәү¬че халыкларга мәхәббәт хисе белән сугарылган җырның сүзләре һәркемнең күңеленә үтеп кереп, тамашачыларны да, жюри әгъзаларын да битараф калдырмады. Җыр тәмамлануга алар аягүрә басып, артистларны алкышларга күмделәр, “Афәрин!” – дип кычкырулар да тиз генә басылмады. 

 

Гадәттәгечә, татарлар күп¬ләп яшәгән Камышлы районы үзешчәннәре дә фес¬тивальдә катнашачак, һәм быел алар “Син яшә, минем Россиям” дип аталган программа әзерләгәннәр. Камыш¬лылыларның отчет концертлары 14 октябрьдә (башлана 13.30 сәгатьтә) Самара филармония сәхнәсендә узачак. 

 

Язманы Әминә ШИҺАПОВА әзерләде.