Бу мәкерле авыру җанымны өзгәли, бар тынычлыгымны алды

“Кызымның борыныннан кинәт кенә кан китте. Үзем туктата алмагач, табибларга мөрәҗәгать иттем. Алар кызымны тикшерде, анализлар бирдек. Аннары Лилианада куркыныч авыру барлыгын әйттеләр. Кызымда Фанкони анемиясе икән. Икенче төрле әйткән­дә, кан рагының бер төре дигән сүз бу. Әлеге диагнозны ишеткәч, башта бөтенләй югалып калдым. Йокым качты, башыма нинди генә уйлар кермәде”, – ди Ләйсән. Лилианада – сирәк очрый торган авыру. Татарстанда аны дәва­лый алмыйлар. Чир чигенергә уйламый, киресенчә, организмга һө­җүм итә. Баланың гемоглобины, тромбоцитлары төшә икән. Авыруын ахыргача тикшереп тә бетер­мәгәннәр. Баланы бары тик сөяк җелеген күчереп утыртып кына коткарып калып була. Газета битләрендә язмышлары бәян ителгән кешеләрне онытмыйбыз. Сабыйлар аеруча күңелгә якын. Лилиананың хәлен дә кү­зәтеп барабыз. Әнисе белән дә сөй­ләшеп торабыз. Моңа кадәр чит ил клиникасына барырга җыен­ган гаилә аптырашта иде. Андагы табиблар бу гаиләнең бөтен­ләй көче җитмәслек сумма сорыйлар. Шушы араларда Лилиананың әнисенә Мәскәүдән хат килеп төшкән. Андагы клиника сабыйга операция ясарга әзер. Кирәкле сумма да өч тапкыр кимегән.– Октябрь аенда Мәскәүнең бер клиникасыннан чакыру алдык. Анда Лилиананы операциягә әзер­­ләячәкләр. Башта химия терапиясе алачакбыз. Беребез дә кызыма донор була алмый. Шуңа күрә чит кешенең сөяк җелеген күчереп утыртырга кирәк булачак. Донор өчен кем түләячәге әлегә кадәр билгеле түгел. Бездән түләтер­ләрме, әллә инде хәйрия фондлары булышырмы – берни әйтә алмыйм. Акча җитмәс дип бик борчылам, – ди Ләйсән. – Кызымны бик тә саклап каласым килә. Бу мәкерле авыру җанымны өзгәли, бар тынычлыгымны алды. Әлегә кадәр безгә ярдәм иткән барлык кеше­ләргә рәхмәт. Авыр вакытларымда ташламассыз дип ышанам. 

 

Лилианага безнең редакция дә ярдәм итәргә булды. Бер төркем җырчылар белән хәйрия концерты уздырып, Сабировлар гаиләсе­нә матди ярдәм күрсәтергә җыена­быз. Концертта катнашырга теләү­челәр күп. Чираттагы хәйрия концерты “Сәйдәш” мәдәният йортында 13 ноябрь көнне 18.00 сәгатьтә узачак. Сабыйга артистлар – җыр­лары белән, тамашачылар чарага ки­лүләре белән булыша ала.  Газета укучылар арасында без үткәргән хәйрия чараларын көтеп алучылар бар. Үзебезнекеләргә әй­ләнгән тамашачылар да җи­тәрлек. Әнә шундыйларны бу чарага көтәбез дә инде.  

 

Билет кирәк кешеләр  89274385613 телефон номерына шалтырата ала.