“Бу хәбәргә ышанырга авыр булды. Бик тәрбияле егет иде, галим кеше иде” (ФОТО)

29 сентябрь көнне «Эфир»дагы – «Перехват», «ТНВ»дагы «Вызов 112» тапшырулары Казандагы «Корстон» кунакханәсе каршында булган юл-транспорт һәлакәте турында күрсәтте. «Киа» автомобиле бер велосипедчыны бәргән. Егетнең хәле авыр, 7нче сырхауханә табиблары аның тормышын саклап калу өчен көрәшә, дип тәмамланды сюжет.

“Булат минем авылдаш иде. Кичә реанимациядә үлгән. Кандидат физмат наук иде. Ике югары белеме бар. Казан Федераль Университетында укыта иде, эшкә барышы булган. ВМКда миннән бер ел соңрак укыды ул. Кичә Булатны машина бәргән дип әни шалтыратып әйткән иде. Ул арада Илнар абыйсы “энем үлде” дип язып җибәрде. Бу хәбәргә ышану авыр булды”.

 

“Бик тәрбияле кеше иде. Беркем турында начар сүз әйтмәде. Бөтен кеше белән дус булды. Эчмәде-тартмады. Сабантуйда гел кунакка керә иде. Бер тапкыр да онытмады. Бертуган сеңлесе һәм әти-әнисе бар. Әтисе шулай ук галим кеше. Булат өйләнмәгән иде. Балалары юк. Яшьли китеп барды шулай. Бик кызганыч...”, - дип сөйләде Рузил.