Әрәм-тамакларга 25 мең салым түләтмәкчеләр

Әгәр дә беркайда да эшләмичә йөрүчеләр дип беренче чиратта елның-ел буена диңгез буйларында кызынып ятучыларны, яхталар, пальмалар фонында фотога төшүчеләрне атасалар бер хәл иде дә бит, ләкин бу гражданнар тыныч йоклый ала, чөнки алар кайдадыр эшли дип исәпләнә. Министрлык рәсми рәвештә теркәлмичә эшләүчеләрне генә җәзага тартырга уйлаган шул – аларга әрәмтамаклык салымы түләттермәкчеләр.

 

Дөрес, синең кайдадыр идән юып йөрүеңне һәм моның өчен акчаңны бернинди документсыз-нисез кесәңә генә салып җибәрүләрен ачыклау җиңел эш түгел. Шуңа күрә Дәүләт Думасында халыкның кайсы рәсми рәвештә эшли, кайсы эшләми икәнен ачыклый торган закон проекты әзерләнеп ята икән. Аның нәтиҗәләре буенча “әрәмтамаклар реестры”, ягъни пенсия системасына да түләү кертми, бернинди салым да түләми торган, әмма шул ук вакытта хөкүмәтнең төрле ярдәменнән, әйтик, бушлай медицина хезмәтеннән файдаланучы гражданнар исемлеге барлыкка киләчәк.

Министрлык мәгълүматлары буенча, бүген әрәмтамак дип 15 миллион гражданны атарга була. “Болар эш яшендәге кешеләр, әмма алардан бернинди дә страховка түләүләре керми”, – диде министр М.Топилин.

 

Бәлки шулайдыр да, ләкин эшләргә теләп тә эш таба алмыйча йөрүчеләр дә күп бит бездә. Алар ни өчен әле салым түләргә тиеш ди?

 

Әрәмтамаклык салымы турындагы закон белоруслар тәҗрибәсенә таянып эшләнелә, имеш. Анда ике ел элек, рәсми рәвештә эшләмәүче гражданнардан елына 3,6 млн белорус сумы күләмендә (250 доллар) салым түләтә башлаганнар иде. Ләкин бу хәл халыкта нык канәгатьсезлек тудырды, нәтиҗәдә хөкүмәт әлеге салымны җыюны туктатырга мәҗбүр булды һәм кем дә кем эшкә урнаша, түләгән салым акчалары аларга кайтарылып биреләчәк дип вәгъдә итте. Ә быелның башында исә түрәләргә ел азагына кадәр әрәмтамаклар исемлегендәге бөтен кешене дә эшле итәргә дигән фәрман чыгарды. Бу исә, белгәнебезчә, эшсезләрдән салым җыюга караганда күпкә авыр эш.

 

Быелның февралендә министр М.Топилин әрәм-тамаклык салымы елына 25 мең сум булырга мөмкин дип белдерде. Ягъни сүз бюджет тишеген каплаячак миллиардлар турында бара. Тик менә министрлык чиновникларына, Белоруссиядәге кебек, бу акчаларны кайтарып бирергә һәм үзенең турыдан-туры вазыйфасы, ягъни эш урыннары булдыру белән шөгыльләнергә туры килмәгәе.