Хакимият имамнарга рәхмәт белдерде

Күптәнге күркәм традиция буенча, Корбан гаете уңаеннан Кызыл Октябрь районы хакимияте һәм өлкә хөкүмәтенең эчке сәясәт министрлыгы төбәгебезнең көньяк-көнчыгыш районнарында газиз халкыбызның рухи ихтыяҗын канәгатьләндереп килгән хөрмәтле имамнарны 5 сентябрьдә Уразавылның “Идел” кафесында кунак итте.

Мәҗлесне  район  администрациясе  башлыгы  Халит  Сөләйманов алып  барды  һәм  үзенең  җылы котлау-теләкләрен  ирештергәч, сүзне өлкәдән махсус килгән эчке сәясәт  министрлыгы  вәкиле  Владимир  Шерстневка  тапшырды. 

Гомер-гомердән  имамнарыбыз-ның күп милләтле төбәгебездә халыкара  дуслыкны  ныгытуга   куй-ган хезмәтенә ул югары бәя бирде, чиксез  рәхмәтләрен  белдерде. “Дөньяда  ислам  белән  бәйле  булган  бик  күп  ыгы-зыгылар  чыгып торганда  өлкәбездә  милләтара татулыкны  саклауда  сезнең хезмәт  аеруча  мөһим”,  -  диде Владимир  Серафимович.  Шул  ук рәвештә “Сергачский” эчке эшләр бүлегенең Кызыл Октябрь районы бүлекчәсе  җитәкчесе  Сергей  Лепёхин да сүз тотты, дин әһелләрен бәйрәм белән котлады. Районның җирле  үзидарә  башлыгы  Рафаэль  Ильясов  чыгышыннан  соң, чәйгә  керешер  алдыннан,  Халит Мөхәммәтовичның  үтенече  буен-ча, Кочко-Пожар имамы Габделхәй хәзрәт Ибраһимов кирәкле хәтем-догасын  кылды. Әйтергә  кирәк, әлеге мәҗлес Пожар мулласының догасы  һәм  үгет-нәсыйхәтләре белән тәмамланды да.Бай  табын  артында  сыйланып утырганда  район  администрациясе  башлыгы  бирегә килә алмаган Нижгар татарлары конгрессы рәисе Гаяр Хәсәновның җылы теләкләрен һәм  кайнар котлауларын  ирештерде,  ә  район  башлыгының  дин мәсьәләләре буенча киңәшчесе һәм Зур Рбишча  авылы  имамы  Мөнир хәзрәт Багаутдиновның теләкләрен азанчысы  Мансур  Шәрәфетдинов җиткерде.

 Рухи  тормышыбызны киң  яктыртып  килгән  “Туган  як”  газетасына да Халит Сөләйманов зур рәхмәтләр  әйтте,  бердәнбер  өлкә татар газетасының абруен, тиражын үстерүдә имамнарыбызның  ярдәм итүләрен  үтенде.  Табын  артында үз борчуларын һәм фикерләрен шулай ук Кече Рбишча, Семочки, Камка,  Суыксу,  Тукай,  Татар  Моклокасы, Атяравыл имамнары белдерде. Кызганычка  каршы,  аларның  кайбер  сораулары  ачык  калды,  чөнки өлкә Диния нәзарәтеннән, билгесез сәбәпләр аркасында, беркем дә юк иде.  “Өлкә  хөкүмәтенә  дә,  Диния нәзарәтенә  дә  чакырулар  юлланды,  әмма  икенчеләренең  биредә булмаулары  аңлашылмый”,  -  диде Халит Мөхәммәтович.

Шөбиле  күмәк  хуҗалыгы рәисе  Фаил  Арифуллинның садакасын  кунакларга  район  администрациясенең  эшләр идарәсе  җитәкчесе  Зәкәрия  Би-лялетдинов  таратты  һәм  килгән кунакларны  “яңа  очрашуларга  кадәр  дип”,  озатып  калды.  Ә имамнар,  үз  чиратларында,  сый-хөрмәт  күрсәткән  милли  район хакимиятенә  чиксез  рәхмәтләрен белдерделәр, эшләрендә уңышлар теләделәр.