30.12.2009 Бәйрәм

«INTERTAT.RU» ГАЗЕТЫ РӘХМӘТ ХАТЫНА ИЯ БУЛДЫ (+КОРПОРАТИВ ФОТОЛАРЫ)

Ел дәвамында «Intertat.ru» газеты Татарстан Милли музее белән тыгыз элемтәдә торды. Без үз укучыларыбызны Татарстан ядкәрханәләрендәге яңалыклар, оештырылган күргәзмәләр белән даими таныштырып тордык

Милли музейнең традицияләргә бай тормышы олыларны да, балаларны да битараф калдырмый. Биредә һәркем үзенә нинди дә булса кызыклы мәгълүмат һәм хәтта шөгыль дә таба ала. Гөлчәчәк Нәҗипова җитәкләгән музей хезмәткәрләре гел хәрәкәттә, үз тарихыбызны киләчәк буынга түкми-чәчми үзенчәлекле итеп җиткерергә омтыла. Директор үзе дә: «Татарстанда музей эше зур үзгәрешләр кичерә. Үзара һәм башка төбәкләр белән элемтәләрне көннән-көн ныгытабыз. Быел Санкт-Петербург белән нәтиҗәле эшләр башкардык. Мәсәлән, “Морза Юсуповлар нәселе тарихы. Казан-Петербург-Париж”, “Федор Шаляпин – Петербургта” экспозицияләре тамашачыда зур кызыксыну уятты. Быел Татарстанның музей хезмәткәрләре Ассоциациясе төзелде. Аңа 19 музей һәм әгъза керде,» – дип сөйләде узып баручы елга нәтиҗә ясап, журналистлар белән очрашуда.

Яңа ел бәйрәме алдыннан Гөлчәчәк Нәҗипова менә инде дүртенче ел рәттән республика журналистларын музейга җыя. Бу юлы да бәйрәм өстәле артында үткәрелгән кичәдә Гөлчәчәк ханым музей тормышына битараф булмаган редакцияләрнең, актив хәбәрчеләрнең иҗатына тукталып китте. Музей җитәкчесе аеруча тырышларына истәлекле бүләкләр тапшырды, алар арасында "Intertat.ru" журналисты Мөршидә Кыямова да бар иде. Газетада музейлар тормышын даими яктыртуга зур урын бирелгәне өчен "Intertat.ru" газетының баш мөхәррире Әлфия Миңнуллина исеменә исә Татарстан Милли музее коллективының Рәхмәт хаты тапшырылды.

Гадәттә журналистлар белән мондый очрашуларда музейның киләчәк гамәлләре дә тәгаенләнә. Әлеге сөйләшүдә, мәсәлән, Татарстандагы кайбер музейларның аяныч хәлләре мәсьәләсе телгә алынды. Әйтик, Казандагы бүлекчәләрнең күбесе төзекләндерүгә мохтаҗ. Казанда 2013 елда узачак Универсиада чарасына аларны рәткә китерү таләп ителә. Чөнки Казанда ул чакта туристлар ашкыны булачаганы шик юк һәм алар Татарстанның ядкәрханәләре белән кызыксынмый калмыячагы көн кебек ачык. Гөлчәчәк Нәҗипова сүзләренә караганда, Татарстан Хөкүмәте музейларга финанс ярдәме күрсәтергә вәгъдә биргән.

Әйтергә кирәк, 2010 елдан музейлар бик күп һәм бик зур мәдәни вакыйгаларга әзерлек башлап җибәрә. Алар – Бөек Җиңүгә 65 ел, Татарстан Республикасының 90 еллыгы, Г.Тукайның 125 еллыгы һәм Л.Н.Толстойның вафатына 100 ел тулу уңаеннан үткәрелечәк чаралар. Киләсе елда ике зур проект – Россиядә Франция елы чаралары һәм Татар костюмнары күргәзмәсенә дә старт бирелер дип көтелә. Шулай ук, 2010 елда Милли музейның 115 еллыгын да киң колач белән уздырырга ниятлиләр. Зур юбилей уңаеннан музей тормышын яктыртып баручы журналистлар арасында бәйге дә игълан ителде. «СМИром МУЗЕЯ» дип аталган әлеге бәйгегә нәтиҗәләр киләсе сентябрьдә – Россия музейчыларының фәнни форумында ясалачак.