Мунчәлиләр кунак җыя

Чүпрәле районы Мунчәли авылында 2008 елдан башлап һәр ел саен Мунчәли авылы көне -Мунчәли укулары бәйрәме үткәрелеп килә. Динебезне, милләтебезне һәм мәдәниятебезне үстерү, татар авылларын саклап калу үрнәкләрен күрсәтү буларак Мунчәли авылы бәйрәменең дәрәҗәсе елдан–ел күтәрелә, масштабы да киңәя бара.

Авыл активистлары һәм читтә яшәүче якташлар ярдәме  белән Мунчәли авылында зур бәйрәм быел X- тапкыр үткәрелә. Ул агымдагы елның 29 июленә билгеләгән.

Әлеге чарага Татарстаннан, Ульяновск, Чувашия, Мәскәү һәм Нижгар өлкәләреннән  күренекле галимнәре, дин әхелләре, танылган шәхесләр, артистлар һәм күренекле якташлар, зур кунаклар чакырылган. Бәйрәм Мунчәли авыл мәчетенең 20 еллыгына багышланган чара  “Мунчәли-укулары” дини җыен белән  башланып китәчәк. Республикабызнын танылган имамнарыннан  бәйрәм вәгазьләре,  дини җырлар, кунаклар дин әһелләре  чыгышы, өйлә намазы, корбан ашлары көннең беренче яртысында  булачак, дип хәбәр итә Оештору комитеты рәисе Илмир Измайлов.

Бөек татар драматургы,  публицист, жәмәгать эшлеклесе, Татарстанның халык язучысы, Татарстан һәм Россия Федерациясенең атказанган сәнгать эшлеклесе, Мунчәли авылының мактаулы гражданы  – Туфан Абдулла улы Миннуллинны искә алу чарасы да каралган.  Чөнки әлеге бәйрәм аның ярдәме, теләктәшлеге  һәм хәер фатихасы белән башланган булган. Исән чакта  Туфан ага  һәр ел саен бәйрәмгә кайтып, халык белән очрашып, аралашып, анда яшәүче халыкны яратып, хөрмәт итеп яшәгән.  Шуңа да Чүпрәле районы  халкы  Туфан Абдулла улын тирән хөрмәт белән искә ала, аның үлемсез әсәрләрен сәхнәләштерә, искә алу кичәләре үткәрелә. 2012 нче елда  мәрхүмнең вафатыннан соң  Мунчәли авылның тарихи-мәдәни мирасын саклап калуга зур өлеш керткәне өчен халык сорау буенча мәктәп диварында барельеф белән эшләнгән мемориаль такта ачыла.

Чарада Галиәскәр Камал театры артистларының да катнашуы көтелә.  Мунчәлинең 510 еллыгы һәм  X- тапкыр узачак Мунчәли авыл бәйрәме унаеннан тантаналы чара, күренекле якташлар һәм кунаклар белән очрашу авыл мәдәният йортында  узачак. 

Ә кичен мәйданда традицион зур бәйрәм концерты көтелә. Россиянең халык артисты  Айдар Фәйзрахманов җитәкчелегендәге  Татарстан Республикасы фольклор музыкасы дәүләт ансамбле, Татарстанның атказанган артистлары Алсу Абулханова, Рәзидә Шәрәфиева, Марсел Вәгыйзов, Азат Абитов, Дилә һәм Булат Нигматуллиннар, Чувашия Республикасы  “Мишәр” халык фольклор ансамбле концерты бәйрәмгә килгән халыкны җыр моңга күмәчәк. Грандиоз шоу тамаша тонге 12 дә зур салют белән тәмамланачак дип ышандыра оешторучылар.

Мунчәлиләр барлык якташларын, Чүпрәле һәм республика халкын  зур  бәйрәмгә чын күнелдән  чакырып көтеп калалар!