Яңавыл мәчете манарасына ай урнаштырырга поп та килде (ФОТО)

Балык Бистәсе районы Яңавыл авылында бүген 11 июнь көнне мәчет манарасын күтәрделәр һәм ай куйдылар. "Матбугат.ру" хәбәрчесе әлеге чарага очраклы рәвештә эләкте. Һәм барысын да фотога төшерде.

Яңавылда бүген 25ләп хуҗалык исәпләнә. Авыл мәчете эшмәкәр һәм депутат Альберт Фәхретдинов тырышлыгы белән төзелгән. Манара куюда ул үзе дә бар иде.

Манара һәм ай куйганда авыл ир-атлары һәм район имамнары тәкъбир әйтеп тордылар.

Чарага Мамадыш районы Баскан авылыннан җырчы Илдар Хуҗа да килгән иде. Ул Яңавыл мәчете имамы Рамазан хәзрәт белән Россия Ислам университетында бергә укыган.

"Рамазан хәзрәт белән бик дус яшибез, бер-беребезгә булышабыз", - диде Шомбыт авылы чиркәвеннән килгән Александр атакай.

Шомбыт, Яңавыл һәм Яңа Сала авыллары бер-берсенә бик якын урнашкан. Төрле милләт һәм дин вәкилләре дус яши.

Шушы төбәкне актив өйрәнүче тарихчы Нурулла Гариф (сул якта). "Яңа Сала авылы тарихы турында китабым әзер, шуны чыгарасым бар", - диде ул.

Әлеге эшләрне башкаручы техникага "Кулон-Агро" дип язылган иде.

Отец Александр һәм дипломлы теология белгече Илдар Хуҗа төрле диннәрнең аермалыгы турында сөйләшә. Сүз уңаеннан, әлеге чарага Отец Александр хатыны һәм балалары белән килгән иде.

Балык Бистәсе районында 40тан артык мәчет бар. Бу фотода шул мәчетләрнең имамнары.

Фотога төшкәндә имамнар Отец Александрны да үз яннарына чакырды. Әлге 25 хуҗалыклы авылда мәдрәсә дә бар. Мәчет манарасына ай куелгач, имамнар шул мәдрәсәгә кереп киттеләр. Монда районның дин әһелләре җыены узды.