«Җәясу»га җиде генә яшь

Вакыт су кебек ага, “Җәясу” районара балалар фольклор фестиваленең узуына да икенче ай инде. Хөрмәтле Тәнзилә ханым Паламарчук башлап җибәргән проект, Аллага шөкер, менә җиденче тапкыр инде җәелде.

Быелгысы бигрәк зур масштаблы булды – үткән елларда катнашучы коллективлар 12-13тән артмаса, быел алар 17 иде. Камка мәктәбе, Пашат башлангыч мәктәп-балалар бакчасы, Кочко-Пожар балалар бакчасы беренче фестивальдән башлап, бүгенгәчә бер дә калмый катнаша килсәләр, Яндавишча, рус Пожары мәктәпләре, Уразавыл балалар иҗат йорты бу чарада беренче тапкыр чыгыш ясады. Шу¬лай ук Татар Моклокасы мәктәбе, Сафаҗай мәктәбе һәм балалар бак¬часы, Семочки, Уразавыл, Зур һәм Кече Рбишча, Шөбиле мәктәпләре дә даими катнаша килә. шунысы шатландыра – рус мәктәпләрендә белем алучы балаларыбыз да якта калмый, бик теләп киләләр һәр ел “Җәясу”га. Лопатинда укучы Печә балалары, Янауда белем алучы Шөбиле һәм Грибан укучылары, Богородскида укучы Мөтеравыл һәм Анды балалары фестивальдә һәрвакыт югары әзерлек күрсәтә. Рус Пожарында укучы Кочко-Пожар балалары да бик матур чыгыш әзерләгәннәр иде.

Кызганычка каршы, даими катна¬шып килүче Петрякс һәм беренче тапкыр килергә җыенган Чүмбәли мәктәпләре коллективлары җитди сәбәпләр буенча килә алмадылар. Киләсе елларда бернинди сәбәп чыкмыйча, без аларның чыгышла¬рын сокланып карарбыз дип ыша¬набыз.

Балаларның “Җәясу”да бик теләп катнашулары, аларның югары дәрәҗәдәге әзерлекләре, әлбәттә, фольклор коллективлар җитәкчеләренең эшләү нәтиҗәсе, гореф-гадәтләребезне, милли мә-дәниятебезне, фольклорны сак-лап үстерүдә аларның һәм проект җитәкчесе Тәнзилә Нурулловнаның өлеше әйтеп бетергесез зур һәм аларга мин иң олы рәхмәтләремне белдерәсем килә.

Фестиваль берничә ел инде “Ту¬ган як” газетасы редакциясе, Сер¬гач районы администрациясенең мәдәният һәм мәгариф бүлекләре белән берлектә оештырыла. Быел оештыручылар исемлегенә татар хатын-кызларының районара “Ак калфак” оешмасы да керде. Безнең бу оешмабыз үзенең эшчәнлеген акрын гына җәелдерә бара.

Үткән елларда “Җәясу” Сергач район мәдәният йортында узды¬рыла килде, ә быелгысын Кочко-Пожар мәдәният йортында узды¬рырга кирәк дигән карарга килдек. Клуб хезмәткәрләренә - директор Ибраһим Мусинга, художество җитәкчесе Эльвира Мусинага, ак¬компаниатор Азат Жиһаншинга, җыештыручы Әлфия Шакировага бу зур чараны уздыруда бөтен як¬тан күрсәткән ярдәмнәре өчен тагы бер тапкыр зур рәхмәт әйтәбез. Ту¬гры дусларыбыз, даими спонсорла¬рыбыз Равил Мангушевка, Харис Хакимовка, Фаил Арифуллинга, Фаил Хамзинга, шулай ук Яңа Мо¬чали мәчетенә һәм, әлбәттә, өлкә татарларының милли-мәдәни автономиясенә дә рәхмәтләрнең иң олысын җиткерәбез, бу очракта кабатлану бер дә артык булмас дип уйлыйм.

Шулай ук ерак юлны якын итеп, махсус Мәскәүдән кайткан яшь, сәләтле җырчы Ринат Закеров¬ка да рәхмәт, ул бу халык иҗаты бәйрәменең бер бизәге булды.

Үзегез күрдегез, бу бик зур чара, шуңа да оештыру эшендә бераз ха¬талар, аңлашылмаучанлыклар да килеп чыккандыр бәлки, бу хакта бер җыелып сөйләшербез әле һәм ал¬дагы елларда оештыру эшләрендә аларны исәпкә алырбыз. Ә кайбер төркем җитәкчеләренең фикерләре белән бүгенге сәхифәдә үк таныш¬тырып үтәбез.

Һәрбер чара – чираттагымы, яисә юбилейлымы – үткәнгә карап нәтиҗәләр ясау гына түгел, күбрәк киләчәкне күзаллау ул. Шуңа күрә “фестиваль инде җиде ел яши” ди¬мибез, “Җәясу”га әле җиде генә яшь дибез. Тагы бер тапкыр рәхмәт һәм уңышлар сезгә!
Наилә ЖИҺАНШИНА,
районара “Ак калфак”
оешмасы кураторы.