Хәния Фәрхи гомеренең иң зур үкенече турында күңел серен чиште (ӘҢГӘМӘ)

— Тормыш иптәшегез бәйрәмнәрдә сюрпризлар ясый беләме?
— Миңа калса, хатын-кызны шаккатыру җиңел эш түгел. Гадәттә, бүләкләрне бергә алабыз. Бәйрәм иртәсендә ул миңа һәрвакыт ак розалар алып кайта. Табын әзерли. Шашлык пешерә, күмердә балыкны тәмле итеп кыздыра.

Моның өчен авылда махсус мич ясап куйды. Учак ягып, шәмнәр куеп, матур кич уздырабыз.

— Кызганычка каршы, тормыш үкенечсез булмый...
— Үкенечем Габделхәйгә малай табып бирә алмавым. Биктаһиров фамилиясе аңарда туктап кала. Иремнең калган туганнары хатын-кызлар — 5 сеңлесе бар.



— Салават Фәтхетдинов: “Бүген кайда карама – йолдыз, җиргә төшеп беттеләр, хәзер йолдызлар өстеннән йөрибез”, - ди. Сез бу хакта нинди фикердә? Татар эстрадасында кемнең иҗаты ошый?
— Хәмдүнә Тимергалиеваның энергетикасына, харизмасына шаккатам. Зәйнәпне тыңлыйм. Асылъяр кыю адымнар белән сәхнәгә чыккан иде, кызганычка каршы, югалды. Ул кыз тавышы һәм матурлыгы белән зур җырчы булырга тиеш иде. Эстрадада күпләр җиңел акча өмет итеп, үзләрен юк итә. Бушлай сыр кайда? Әйе, капканда. Бүгенге көндә үзең тырышмыйча зур үрләр яулап булмый. Ир-ат җырчыларга килгәндә, әлбәттә, Салават белән Айдар! Алар белән якын дуслар да мин. Яшьләрдән Раяз Фасыйховның иҗатын яратам, аның таланты күпкырлы.

— Бервакыт Хәния Фәрхи матурлык салоны ачкан икән, дип сөйләделәр.
— Ике куянның койрыгын берьюлы тотып булмау сәбәпле, матурлык салоны ачылырга тиешле бинаны арендага бирергә уйладым. Тотынсаң, эшне җиренә җиткерергә кирәк бит. “Хәниянең матурлык салоны” дигәч, халык миңа дип киләчәк. Ул эшкә мин бөтенләй кереп чумарга тиешмен. Минем уйлавымча, ул “Хатын-кыз клубы” шикелле урын булырга тиеш. Прическа, макияжлар ясаучы гына түгел, ә психологик үзәк итәсем килә. Рәнҗетелгән, кимсетелгән гүзәл затларга ярдәм итү.

— Сезгә бизәнергә күпме вакыт кирәк?
— Өйгә кеше килеп керсә, 6-7 минут та җитә. Машинада да шул вакыт эчендә бизәнә алам. Урамга, кибеткә чыгарга икән, якынча 20 минут вакыт кирәк. Әлбәттә, сүз сәхнә макияжы хакында бармый. Аның өчен профессиональ куллар һәм озак вакыт таләп ителә. Аеруча прическага. Моңа тиклем төркемдәге егет-кызлар прическа ясый иде. Аларны махсус укытып чыгара идек. Биюче егетебез Айрат, Чулпан исемле саксофончыбыз эшләде. Ә хәзер үзебез белән үз эшенең остасы Рәмиләне йөртәбез.

— Ялгышмасам, күп еллар бер үк төрле прическа белән йөрисез.
— Бит төзелеше үзенчәлекле, башка прическа килешми. Кыйммәтле париклар да алып карадым. Парикны салгач, хатын-кыз бөтенләй ямьсезләнә икән. Иң яхшысы — табигый кыяфәтеңә канәгать булып, үз чәчең белән йөрү.

— Хәния Фәрхи дә банкетларда җырлыймы?
— Ник җырламаска?! Бу эш бер дә җиңел түгел. Кеше ашап-эчеп утырганда, аларның күңелен күреп кара әле?!

— Ә заказ бирүчеләр Сезнең белән элемтәгә ничек чыга?
— Кесә телефоннары барлыкка килгәннән бирле Габделхәйнең номеры бер дә үзгәрмәде - аның аша. Күп очракта миңа шалтыраталар. Телефон номерымны яшермим, сораган кешегә бирәм. Оештыру, финанс мәсьәләләре буенча сорау яудыра башласалар, Габделхәйгә шалтыратыгыз дип әйтәм.