Татарстан мөфтие сайланды (ВИДЕО)

Казанның “Корстон” комплексында уза торган Татарстан мөселманнарының VII корылтаенда Татарстан Республикасы Диния нәзарәте рәисе, мөфти сайланды. Әлеге вазифаны янә Камил хәзрәт Сәмигуллин башкарачак. Казанның “Корстон” комплексында узган Татарстан мөселманнары корылтаенда делегатлар аның кандидатурасын яклады.

Мөфти ачык тавыш бирү юлы белән сайланды. Каршы тавыш бирүчеләр булмады.

Сайлау нәтиҗәләре билгеле булгач, янә сайланган мөфти Камил Сәмигуллин Корылтай делегатларына "Ышанычыгызны аклармын" дип вәгъдә бирде.

Шулай ук Татарстан Республикасы Диния нәзарәте рәисенең, мөфтинең беренче урынбасары сайланды. Мөфти Камил хөзрөт Сәмигуллин Рөстәм Вәлиуллин кандидатурасын тәкъдим итте. Делегатлар аны хуплады.

Искәртеп үтик, әлеге кандидатурага Казанның “Котдус” мәчете имам-хатыйбы Рөстәм Вәлиуллин, Казанның Кол Шәриф мәчете имамы Илфар Хәсәнов дәгъва кылган иде.

Рөстәм Вәлиуллин сайлауга кадәрге чыгышында үз фикерләре белән чыгыш ясады. "Безнең төп максат - Татарстан өммәтен ханәфи мәзһабенә, Татарстан дин галимнәрә, мәгърифәтчеләре мирасына таянып үстерү", - диде ул.

Моннан тыш, Татарстан Республикасы Баш казые сайланды. Әлеге вазифаны янә Җәлил хәзрәт Фазлыев башкарачак.

Казанның “Корстон” комплексында узган Татарстан мөселманнары корылтаенда делегатлар аның кандидатурасын бертавыштан хуплады. Баш казый ачык тавыш бирү юлы белән сайланды.

Сайлауга кадәр Җәлил хәзрәт Фазлыев чыгышында казыйларның төп бурыч-вазифалары турында билгеләп үтте. Аерылышулар күп булуы, имамнар әзерләү, мәчетләргә балалар йөрмәүгә карата булган шикаятьләр ишетелү кебек мәсьәләләрне күтәрде.