АВЫЗЫҢ ПЕШСӘ, ӨРЕП КАБАСЫҢ

Инде өч елдан артык төзелүче Тинчурин театрын өч айда өлгертәчәкләр. Кемнәрдер моңа ышанды, кемдер ышанмады. Шунысы хак: театр ачылганчыга кадәр эш барышы ныклы сак астына алыначак.

Шушы көннәрдә генә Татарстан Дәүләт Советының Фән, мәгариф, мәдәният һәм милли мәсьәләләр комитеты рәисе Разил Вәлиев җитәкчелегендәге депутатлар төркеме К. Тинчурин исемендәге Татар дәүләт драма һәм комедия театрында "кунак" булып кайтты. Кунак булу күп тапкырлар дәвам итәчәк әле. Разил әфәнде әйтүенчә, ишек тоткасы куйганчы биредә депутатларның эзе суынмаячак.

– Инде озакка сузылган ремонт эше турында Дәүләт Советы сессиясендә кат-кат сөйләнелде, – диде ул. – Уйлаштык та, болай булмый бит инде, эшне җиренә җиткерергә кирәк, дидек. Тугыз депутаттан торган төркем төзелде. Алар фәкать Тинчурин театрының төзелеше өчен җавап бирәчәк.

Исәп-хисап эшләрен, финанска кагылышлы мәсьәләләрне хисап палатасы үз канаты астына алачак. Ә театр җитәкчелегенә һәр тиен өчен җавап бирергә туры киләчәк. Инде ничә еллар буе саллы суммалар "имгән" театр төзелешенең тагын күпмегә төшәсен төгәл генә әйтүе дә кыен. Бюджеттан иң беренче чыгым 182 миллион тәшкил иткән, аннан – 26, соңрак 6 миллионнан артык...

– Бинаның шактый өлеше төзелеп беткән инде, алай ук зур акчалар кирәк булмас дип уйлыйбыз, – ди Разил Исмәгыйлевич. – Ачылышны тамашачылар түземсезлек белән көтә. Элек Тинчурин бинасына килеп керү белән үк искелек, черек исе борынга килеп бәрелә иде. Бу яңа бина татар халкының рухи халәтенә, күңел байлыгына тәңгәл килергә тиеш.

Театрның директоры Фәнис Мөсәгыйтов сүзләренә караганда, Тинчурин бинасын баштанаяк төзекләндереп чыкканнар. "Коры стена гына иске театрныкы. Бинаның 90 процентын бөтенләе белән үзгәрттек", – ди җитәкче.

Сәхнә метр ярымга киңәйгән, янып-пешеп утырган тамашачыларга да уңайлыклар тудырылган: җилләтү системасы урнаштырылган. Кече зал, галерея, музей заманча җиһазлар белән баетылган. Сайт каталогом с девушками по вызову dosug-omsk.ru

Барыннан да бигрәк түшәмгә бизәкләр төшерү авыр булган. Аларны иске эскизлар ярдәмендә өр-яңадан яңартырга туры килгән. Директор әйтүенчә, 1953 елгы ремонттан соң бинадагы үзенчәлекле бизәкләрнең күбесе сакланмаган да. Аларны сакланган ярым-йорты кыйпылчыклары ярдәмендә төзекләндергәннәр.

Тамашачылар өчен машина кую урыны, цехлар, декорацияләр саклау өчен махсус бина төзеләчәк. Аның өчен театрга 30 сутый җир бүлеп бирелгән. Димәк, алга таба эшләргә дә эшләргә генә кала. Тимерне кызу вакытында сугу хәерле. Югыйсә икенче кризис агымы килеп җитәргә бик мөмкин.