Милли районда - милли көрәш

23 мартта Кызыл Октябрь районы Уразавылда өлкәбезнең данлыклы спортчылары, атказанган тренерлары, югары квалификацияле хөкемдарлар яшь, өметле егетләрнең көрәшенә җыелдылар, аларның теоретик һәм физик әзерлекләрен бәяләделәр. Кайберәүләр өчен кызыл Октябрь районы администрациясе башлыгы кубогы турнирында чыгыш ясау дебют булса, тәҗрибәле көрәшчеләр өчен бу ярышны киләсе сабантуйлар сезонына әзерләнү этабы дип әйтергә мөмкин.

Алда әле күп көрәш турнирлары, сабантуйлар булыр. Сәләтле егетләребезнең бөтен көчләрен, дәртләрен, осталыкларын кулланып, медальләр белән бергә халык данына да ирешүләрен телибез.

Кызыл Октябрь районы администрациясе башлыгы кубогына милли көрәш турниры район мәдәният йортында үтте. Аны балалар һәм яшүсмерләр спорт мәктәбе мәгариф бүлегенең спорт секторы һәм район администрациясе белән берлектә оештырды.

Спорт бәйрәмен җирле үзидарә башлыгы Рафаэль Ильясов, район мәгариф бүлеге урынбасары Равил Арибҗанов ачып җибәрделәр, Яшьләр палатасы рәисе Фәнис Сабиров көрәшнең тарихына кагылып үтте.

Судьялар коллегиясендә Марат Шиафетдинов, Рәмис Закиров һәм Рамил Мусин утырдылар. Мәрәдә хөкемдар вазифалары Камил Шәймәрданов, Әхмәр Закиров һәм Ханнән Мусинга йөкләнде.

Җиде авырлык категориясендә бил алышырга Рбишчадан, Сафаҗайдан, Чүмбәлидән, Яндавишчадан, Петрякстан, Камкадан һәм Грибаннан 40ка якын егет килгән иде. Фаворитлар булып Рбишча һәм Сафаҗай көрәшчеләре чыкты, чөнки күбесе очракта алар беренче урыннарны үзара бүлештеләр.

Тренерларның үз көрәшчеләре өчен дулкынланулары аеруча күзгә бәрелде. Алар һәр алымны эмоцияле кабул иттеләр, егетләргә мәрәгә чыгар алдыннан тиешле киңәшләр бирделәр.

Абсолют батыр исемен Рамил Мусин кул астында осталыгын үстергән Сафаҗай егете Ханнән Камалетдинов яулады.
Командалы зачетта беренче урын Кызыл Октябрь районына, икенче Пильна, өченче Сергач көрәшчеләренә бирелде.
Бүләкләү тантанасында җирле үзидарә башлыгы Рафаэль Ильясов, өлкә көрәш федерациясе президенты Максут Сәмиуллин, атаклы спортчы, атказанган тренер Зәки Валемеев һәм Кочко-Пожардан көрәш ветераны Наил Аймасов та катнаштылар. Яшьләр палатасы рәисе ямьле көрәш күрсәткәне өчен махсус приз белән Рбишча егете Ваиз Хакимовны бүләкләде.

Рафаэль Ильясов барлык команда¬ларга, оештыручыларга район адми¬нистрациясе исеменнән рәхмәтләрен белдерде һәм бу турнирны оештыру урынын киләчәктә үзгәртергә кирәк дигән фикерен дә әйтте.

Көрәшчеләр һәм делегацияләр әгъзалары өчен “Идел” ашханәсендә төшке аш оештырылган иде.

Фикерләр:
- Турнир, тулаем алганда, югары дәрәҗәдә үтте. Иң мөһиме - зур зыянланулар булмады. Җиңүгә омтылу, әлбәттә, мактаулы күренеш, әмма безнең өчен көрәшчеләрнең сәламәтлеге һәрвакыт беренче урында. Авылларыбызда булган барлык көчле яшь көрәшчеләребез җыелды милли район үзәгенә. Сергач районыннан ФСК базасында шөгыльләнүче егетләр катнашты. Шулай да, үткән еллар белән чагыштырганда, көрәшчеләр саны азрак булды шул, чөнки мәктәп яшендәге балалар саны елдан-ел кими бара. Ә турнир, әйткәнемчә, шәп оештырылган иде. Көрәшчеләргә бөтен осталыкларын күрсәтер өчен барлык шартлар тудырылды, - ди өлкә көрәш федерациясе президенты Максут СӘМИУЛЛИН.

- Һәр спорт ярышы сәламәт яшәү рәвешен пропагандалау чарасы булып тора. Ә татарча көрәш милли традицияләрне саклап калуда да зур роль уйный.

Катнашучылар җиңүгә көчләрен кызганмыйча ирештеләр. Шәхсән үзем берничә яңа алымны дә күреп алдым, тәрбияләнүчеләремә аларны өйрәтергә тырышырмын. Малайлар шунда үзара аралашып, яңа дус¬лар табалар, тәҗрибә туплыйлар. Көрәш турнирлары күбрәк булсын иде.
Бөтен Пильна районы команда¬сы исеменнән оештыручыларга рәхмәтләр генә әйтәсе килә, - ди Петрякс командасы тренеры Әхмәр ЗАКИРОВ.

- Иң мөһиме - милли көрәш буенча турнирлар ешрак узыдырылсын иде. Чөнки көч сынашканда гына көрәшченең дәрәҗәсе үсә.
Безнең команда һәр ел район администрациясе оештырган ярышларда катнаша, бер генә булса да призлы урынны алып кайта. Бу юлы Рөстәм Камалов, Динар Мусин, Илсаф махмутов һәм марат Нәбиуллин бил алыштылар. Иң җиңел авырлыкта Илсаф өченче урынга иреште. Хәзер без Уразавылда үтәчәк кече сабантуйга актив әзерләнә башларбыз, - ди Яндавишча мәктәбенең физкультура укытучысы Илдар КУТДУСОВ.