|
|
Бүген кемнәр туган
|
|
Архив
|
05.03.2017 Әдәбият
“Тормыш авыр! Ә син түз, бала!” (Гөлнур Васыйлова шигырьләре)Гөлнур Зариф кызы Васыйлова – Мамадыш районы Түбән Ушмы авылында туып-үскән, мәдәният хезмәткәре, дүрт китап авторы, Шәйхи Маннур исемендәге премия лауреаты. Бүген "Матбугат.ру" укучыларына Гөлнур Васыйлованың берничә шигырен тәкъдим итәбез. Кемдер...
Кемдер мине ялгышлардан саклый,
Гел артымнан йөри сак кына.
Бик аз гына сизсә, шаян уйны –
Төзәтергә диеп ашкына.
Тормышымда абынып китсәм, әгәр,
Кемдер ипләп кенә кул суза.
Юлларымда адаштырмас өчен
Караңгыда айлы юл сыза.
Мин ялгызым түгел – Иләһем ул!
Юлларымны якты итүче.
Кай тарафка таба атласам да,
Мине саклап, яклап йөртүче.
Кеше булып кал!
Гайрәтле тау, әйтче миңа,
Ничек синдәй горур калырга?
Вак җаннарны күрми, ишетмичә,
Зур эшләрдән кыя салырга?
Әйтче, ташкын! Сүзләр – ялкын.
Өтә җанны, телә бәгырьне.
Ничек кенә синдәй көчле булып,
Ургып сүндерергә мәкерне.
Әй, адәми зат! Аңла шуны,
Табалмассың син башка юлны.
Кеше булып кал син! Сабыр бул!
Гайрәтең һәм горурлыгың шул!
Якты уй
Якты уйлар, күздә нурлар
Йөзгә елмаю тула.
Кәеф күтәренкелеге
Якты уйлардан тора.
Якты уйда – яхшы караш,
Сөенеч балкып тора.
Якты уй - уңыш чаткысы,
Дусларның якынлыгы.
Якты уйларда чагыла
Тормышның яктылыгы.
Якты уйда – яхшы караш,
Сөенеч балкып тора.
Сүз
Сүз хәнҗәрен кирәкмәгән чакта,
Тартып алабыз да кыныннан.
“Дәшмәү – алтын” гыйбәрәсен онытып,
Бик нык үкенәбез соңыннан.
Сүз бик көчле, йөрәк түрендәге,
Иң нечкә кылларны тибрәтә.
Җанны – тәнне айкап, йөрәкләрне
Ачу ялкынында көйрәтә.
Бәллүр кебек затлы, татлы сүзләр,
Туңган йөрәкләрне эретә.
Җылы сүзләр кирәк безгә бары,
Татлы сүзләр мәңге сөйдертә.
Каенкаем
Каенкаем, син бик тыныч бүген -
Күзләремне алмый карыймын.
Күз тимәсен зифа буйларыңа,
Бик гүзәлгә сине саныймын.
Кичә генә әле бәргәләнеп,
Усал җилләрдән син сакландың?
Нәфис гәүдәң аттың уңга – сулга,
Җаның куяр урын тапмадың.
Лепердәшеп яфрак – алкаларың,
Бүген серләшәләр үзара.
Баш очыңда нәни ябалдашың,
Батыраеп саллы сүз ала:
“Тормыш авыр! Ә син түз, бала!”
--- |
Иң күп укылган
|